ახალციხის სამხატვრო სკოლაში ხანძარი გაჩნდა

სამხატვრო სკოლაში ერთი სკამი დაიწვა. ხანძარი შენობაში, დაახლოებით, 20:30 საათზე გაჩნდა. მომხდარს სკოლის ერთ–ერთი მასწავლებელი შემთხვევით შეესწრო.

„სულ სხვა რამეზე ვიყავი ქალაქში გამოსული, სკოლაში შემთხვევით შევედი, კარი რომ გავაღე კვამლი მეცა, მაშინვე დავრეკე 112–ში“, – ამბობს სამხატვრო სკოლის მასწავლებელი ზურა ინასარიძე.

მისი თქმით, ერთ–ერთ ოთახში მოსწავლეების ნამუშევრების გამოსაწვავად სპეციალური ღუმელი იყო ჩართული და ცეცხლი დენის გამანაწილებელს ეკიდა: “ეს ღუმელი როცა ნამუშევრები გვაქვს გამოსაწვავი მუდმივად ჩართულია და გამართულად მუშაობს. წლებია ასე გვაქვს და ღამეც ვტოვებთ. ახლა რა მოხდა არ ვიცი“.

შემთხვევის ადგილზე იმყოფებოდნენ სახანძრო–სამაშველო სამსახურის და პოლიციის თანამშრომლები. სამხატვრო სკოლაში მივიდნენ ადგილობრივი თვითმმართველობის წარმომადგენლებიც.





[თინათინ ზაზაძე, ახალციხე]