თამბაქოს კანონი და კვების ობიექტები – რამდენი პირი დაჯარიმდა რეგიონში

ახალციხეში თითქმის ყველა კვების ობიექტში თამბაქოს მოწევის ამკრძალავი ნიშნებია გაკრული, მაგიდებზე აღარ დევს საფერფლეები, ასევე, შენობებში აღარაა კვამლი. თუმცა, კაფეებსა და რესტორნებში ამბობენ, რომ კანონის ამოქმედება უმტკივნეულოდ არ მომხდარა და გარკვეული პრობლემები კლიენტებთან უკვე შეექმნათ.

„ახალგაზრდებს შენობაში უნდოდათ მოწევა, ამის გამო ვითარება დაიძაბა. შევძელი და გარეთ გავიყვანე. ვეცადე სიტუაცია განმემუხტა“, – ამბობს კაფე–ბარ „საღიღინოს“ მენეჯერი დავით ბირჩაძე.

შენობაში თამბაქოს მოწევისას შენიშვნაზე კლიენტები რომ ყოველთვის არ რეაგირებენ, ამაზე კაფე „ფონტანას“ მფლობელი მარგალიტა თათეშვილიც საუბრობს: „შენიშვნის დროს ცოტას ჭირვეულობენ, არ უნდათ გარეთ გასვლა“.

თათეშვილი ამბობს, რომ ახალი კანონის გამო ბევრი კლიენტი დაკარგა. მას მიაჩნია, რომ შენობებში მწეველებისთვის ცალკე ადგილი უნდა იყოს გამოყოფილი.

რესტორან „ივერიაში“ კლიენტებს ადმინისტრაციის წარმომადგენლებთან ერთად მომსახურე პერსონალიც აქტიურად აკონტროლებს: „რომელი თანამშრომელიც შეკვეთას ღებულობს, ის აფრთხილებს მათ, რომ შენობაში არ უნდა მოწიონ. ისინი ასე თავიდანვე ცდილობენ ვითარების დარეგულირებას, რომ მერე რესტორანში პრობლემები არ შეიქმნას“, – ამბობს რესტორან „ივერიის“ მესაკუთრე თამუნა მაზმიშვილი.

ახალციხეში მოქმედ საშაურმეებში, როგორც მათი მფლობელები ამბობენ, კანონის ამოქმედებიდან დღემდე მომხმარებლებთან კონფლიქტი არ მოსვლიათ: „ადრე ეწეოდნენ ჩვენთან, მაგრამ თამბაქოს ამკრძალავი ნიშნები პირველივე დღეს გამოვაკარით და მას შემდეგ მოწევა აღარავის უცდია. ჩვენთან ყველა ასაკის ადამიანი შემოდის და კარგია, რომ ეს კანონი მიიღეს, შენობაში კვამლი აღარაა და ხალხიც თავისუფლად სუნთქავს“, – ამბობს ზურა ყულჯანიშვილი, რომელიც შაურმას ამზადებს.

გახსნის დღიდან აკრძალული იყო მოწევა საშაურმეში „კაი პონტი“. როგორც მისი მესაკუთრე თამარ ქურდაძე ამბობს, მათ თავიდანვე ბევრი მომხმარებელი ჰყავდათ: „მიზეზი ის იყო, რომ კლინეტებს სუფთა გარემოში შეეძლოთ ყოფნა, რადგან შენობაში კვამლის სუნი არ იდგა“.

რესტორან „ვარძიაში“, „ალავერდში“, „რომანტიკაში“, „იმერეთსა“ და „რაბათში“ ამბობენ, რომ ახალი კანონის ამოქმედებას კლიენტების რაოდენობაზე არ უმოქმედია. თუმცა, „ალავერდსა“ და „იმერეთში“ ფიქრობენ, რომ სამომავლოდ მწეველებისთვის ცალკე სივრცეები უნდა გაკეთდეს.

შინაგან საქმეთა სამინისტროში აცხადებენ, რომ სამცხე–ჯავახეთში კანონის ამოქმედებიდან ერთ თვეში 13 პირი დააჯარიმეს, თუმცა, აქედან კვების ობიექტში არცერთი შემთხვევა არ დაფიქსირებულა.

„თამბაქოს კონტროლის შესახებ“ კანონი 2018 წლის პირველი მაისიდან ამოქმედდა. ჯარიმა ფიზიკური პირზე 100, ხოლო ორგანიზაციებისთვის 500 ლარია. ფაქტის დარღვევის შემთხვევაში მოსახლეობა შესაბამის ადმინისტრაციას, ან 112–ს უნდა დაუკავშირდეს.

[ნანა ინასარიძე, ახალციხე]