თამბაქოს კანონის მესამე დღე – დაიწერა თუ არა ჯარიმა სამცხე–ჯავახეთში

შინაგან საქმეთა სამინისტროს ინფორმაციით, „თამბაქოს კონტროლის შესახებ“ კანონის ძალაში შესვლიდან პირველი მაისიდან დღემდე, სამცხე–ჯავახეთიდან 112–ზე მოქალაქის, ან რომელიმე ორგანიზაციის მხრიდან შეტყობინება არ დაფიქსირებულა.

როგორც სამინისტროში აცხადებენ, სამ დღეში პოლიციაში ქვეყნის მასშტაბით 12–ზე მეტი შეტყობინება შევიდა. რაც შეეხება იმას, თუ რამდენი საჯარიმო ოქმი დაიწერა ზუსტად ამ სამი დღის განმავლოაბში, ან დადასტურდა თუ არა კანონდარღვევის ფაქტები, სამინისტრომ ინფორმაციის გამოთხოვა წერილობით გვთხოვა.

შეგახსენებთ, რომ პირველი მაისიდან საზოგადოებრივ ტრანსპორტში, დაწესებულებებში, რესტორნებსა და კაფეებში სიგარეტის მოწევა აიკრძალა.იმ შემთხვევეში, თუ სიგარეტს იმ დაწესებულებაში მოწევთ, სადაც აკრძალულია, პირველად 50 ლარით დაჯარიმდებით, დაწესებულების ადმინისტრაცია კი 500 ლარით. განმეორების შემთხვევაში პირი 100 ლარით დაჯარიმდება, ხოლო დაწესებულება – 1 000–ით.

[თინათინ ზაზაძე, ახალციხე]