დახურულ შენობებში, საზოგადოებრივ ტრანსპორტსა და სტადიონებზე შესაძლოა მოწევა აიკრძალოს

კანონპროექტთა პაკეტის მიხედვით, თამბაქოს მოწევა აიკრძალება დახურულ სივრცესა და საზოგადოებრივ ტრანსპორტში, ზოგიერთ ღია სივრცესა და შეკრებაზე. ასევე, აიკრძალება თამბაქოს ნაწარმის რეკლამა, სპონსორობა და პოპულარიზაციის სხვა ფორმები, თამბაქოს ნაწარმის ხილული განლაგება, თამბაქოს რეალიზაცია გზის სავალ ნაწილზე (ე.წ. „დრაივი“). ცვლილების მიხედვით, თამბაქოს კოლოფებზე გაიზრდება სამედიცინო გაფრთხილების ზომა და დატანილ იქნება პიქტოგრამებიც. დარეგულირდება ელექტრონული სიგარეტის საკითხიც.

საკანონმდებლო ცვლილებების შემუშავების მიზანი თამბაქოთი გამოწვეული დაავადებების და სიკვდილიანობის, ასევე, ეკონომიკური და სოციალური ზარალის შემცირებაა. კანონპროექტის ავტორის განმარტებით, თამბაქოსთან დაკავშირებული სათანადო ღონისძიებების განხორციელებას მოითხოვს საქართველოს ევროკავშირთან დაახლოების პროცესიც.

„თამბაქოს კონტროლის ალიანსის“ წარმომადგენლებმა და კანონპროექტის თანაავტორებმა გიორგი ბახტურიძემ და კახა ღვინიანიძემ განაცხადეს, რომ საჯარო და სამასპინძლო შენობებში თამბაქოს კვამლის მიკრონაწილაკების შემცველობა ერთ კუბამეტრ ჰაერზე დასაშვებ ზღვარს 40-ჯერ აღემატება. განსაკუთრებით მძიმე მდგომარეობაა კაფე-ბარებში. გიორგი ბახტურიძის განცხადებით, თამბაქო რეკლამირებული და ხელმისაწვდომია ბავშვებისთვის.

კანონპროექტს პარლამენტის ჯანმრთელობის დაცვისა და სოციალურ საკითხთა კომიტეტის წევრებმა მხარი დაუჭირეს.

[SKNEWS.GE]