აბასთუმანში წყლის სისტემის რეაბილიტაციის მეორე ეტაპი იწყება

ტენდერს „გაერთიანებული წყალმომარაგების კომპანია„ 4 182 340 ლარზე აცხადებს. ეს სამუშაოების მეორე ეტაპია.

ამ თანხით, აღდგება აბასთუმანსა და არაზინდოს დასახლებაში არსებული წყალმომარაგების სისტემა, რომელიც XX საუკუნის 20-იან წლებშია მოწყობილი.

სამუშაოების ფარგლებში მოეწყობა წყლის სათავე ნაგებობა, წყალმომარაგების ქსელი და მილდენი, ამორტიზებული ფოლადის მილები პოლიეთილენის მილებით სრულად ჩანაცვლდება, რეაბილიტაცია ჩაუტარდება რეზერვუარს.

ამ დროისთვის, აბასთუმანში წყალმომარაგების სისტემის რეაბილიტაციის პირველი ეტაპის სამუშაოები მიმდინარეობს. პროექტი სახელმწიფო ბიუჯეტიდან 3 727 121 ლარით ფინანსდება.

მთლიანობაში, აბასთუმნის წყალმომარაგების სისტემის მოწყობისთვის უკვე დაახლოებით რვა მილიონი ლარია გამოყოფილი.

[თაკო ფეიქრიშვილი, ადიგენი]