მგფ: ახალდაბაში სასმელი წყლის ფილტრები გამართულად მუშაობს

„ეს საკითხი უკვე შევისწავლეთ, პრობლემა აქვს შიდა მილებს, რომელიც ძველია და სკდება. მუნიციპალიტეტმა უნდა იზრუნოს მის რეაბილიტაციაზე. სათავე ნაგებობა გამართულად მუშაობს", – გვითხრეს "მუნიციპალური განვითარების ფონდის" საზოგადოებასთან ურთიერთობის სამსახურში.

„მუნიციპალური განვითარების ფონდმა“ საფილტრი ნაგებობის მდგომარეობის შემოწმება, 18 სექტემბერს, ადგილობრივების პროტესტის შემდეგ დაიწყო. ახალდაბელები აცხადებდნენ, რომ მიუხედავად ახლადმოწყობილი სათავე ნაგებობისა, დაბაში გაუფილტრავი და დაბინძურებული წყალი მოდიოდა.


ის, რომ პრობლემა სასმელი წყლის შიდა ქსელს აქვს და არა საფილტრ ნაგებობას, ამაზე ბორჯომის მერიაშიც საუბრობენ. მერის მოადგილე ბუბა ბერიძე ამბობს, რომ მიმდინარე წელს შიდა ქსელი ვერ მოეწყობა, რადგან ბიუჯეტში თანხა არაა, მომავალ წელს კი მილების შესაცვლელად ხარჯებს გაითვალისწინებენ.

ახალდაბაში 700 კომლი ცხოვრობს და სამ ათეულ წელზე მეტია ადგილობრივები წყლის პრობლემაზე ჩივიან. მიუხედავად იმისა, რომ სათავე–ნაგებობის რეაბილიტაცია რვა თვის წინ დასრულდა, დასახლებაში ისევ დაბინძურებული წყალი მოდის.

ახალდაბაში სათავე–ნაგებობის სარეაბილიტაციო სამუშაოები, გასულ წელს, მუნიციპალური განვითარების ფონდის დაფინანსებით შპს „ერისიმედმა“ და „კიევმეტრომშენმა“ შეასრულა. პროექტისთვის 743 928 ლარი დაიხარჯა.

[ლუბა გიორგაძე, ბორჯომი]