აბასთუმანში წყლის სისტემის მშენებლობის მეორე ეტაპი იწყება

კურორტის წყალმომარაგებისთვის შესაბამის ხელშეკრულებას ხელი „გაერთინაბეული წყალმომარაგების კომპანიის“ დირექტორმა ეკატერინე გალდავამ და კონტრაქტორი კომპანიის - შპს „ჯი პი სის“ წარმომადგენელმა, ნუგზარ რობაქიძემ მოაწერეს.

ხელშეკრულება ასევე ითვალისწინებს წყალმომარაგების სისტემის სარეაბილიტაციო სამუშაოებს არაზინდოს დასახლებაშიც.

წყალმომარაგების კომპანიის ინფორმაციით, სამუშაოები ითვალისწინებს ამორტიზებული ფოლადის მილების ახლით ჩანაცვლებას, მოეწყობა წყლის სათავე-ნაგებობა და წყალმომარაგების ქსელი, რეაბილიტაცია ჩაუტარდება რეზერვუარს. დაგეგმილია მომხმარებლების გამრიცხველიანება“.

პროექტის განხორციელებისთვის დაახლოებით ოთხი მილიონი ლარია გამოყოფილი.

„ამ ეტაპზე, აბასთუმანში არსებული წყალმომარაგების სისტემა მოძველებულია და რეაბილიტაციას საჭიროებს, მოსახლეობას წყალი შეფერხებით მიეწოდებოდა. სამშენებლო სამუშაოების დასრულების შემდეგ, ადგილობრივი მოსახლეობა და კურორტის დამსვენებლები უწყვეტი წყალმომარაგებით ისარგებლებენ“, - განმარტავენ კომპანიაში.

[sknews.ge]