ალბერტ ავეტისიანი - რვა წლის სპიდკუბერი, რომელიც მსოფლიო რეკორდისთვის ემზადება [Video]

ალბერტის მამა, ზაქარია იხსენებს, რომ რუბიკის კუბის ყიდვა პირველად ექვსი თვის წინ სთხოვა: „ეზოს ბავშვები თამაშობდნენ–ხოლმე და მათგან სწავლობდა. მერე მითხრა მიყიდეო და დავინახე, როგორ მოხერხებულად აწყობდა, თუმცა, ბოლომდე მაინც ვერ გაუგო და მეგობარს სთხოვა დახმარება. იმას უთქვამს, ჯერ პატარა ხარ, მაგისთვის დიდი დრო გჭირდებაო. სახლში რომ მოვიდა, ძალიან გაბრაზდა. ასე თქვა, მე მაინც ვისწავლიაო. შევიდა ინტერნეტში, უყურა და უცებ ისწავლა“.

იმ დღის შემდეგ ხელში მუდმივად კუბი უჭირავს. მშობლებიც, სადაც კი განსხვავებულ რუბიკის კუბს ნახავენ, ყიდულობენ. ალბერტმა ბოლოს gan356 arsm-ის ფირმის „მონსტრი“ პროფესიონალური რუბიკის კუბი შეიძინა და ახლა მის სწრაფად აწყობაში ვარჯიშობს. მის კოლექციაში სამკუთხედის, ოთხკუთხედის, ცილინდრის,“ მონსტრის“ და კიდევ ბევრ უცნაურ კუბს ნახავთ.

რუბიკის კუბის სწრაფად აწყობაში საკუთარი რეკორდიც აქვს, 27 წამი. თუმცა იცის, რომ კუბის აწყობაში მსოფლიო რეკორდი 22 წლის ავსტრალიელმა, ფელიქს ზემდეგსმა, 4.22 წამში მოხსნა. ალბერტს უნდა, რომ ჩემპიონს აჯობოს და მისი შედეგი გააუმჯობესოს. მისი ერთ–ერთი ოცნება სპიდკუბერობაა - ის, ვინც კუბებს სწრაფად აწყობს.

„კუბების აწყობას ექვსი ეტაპი აქვს. სამი–სამზე კუბის აწყობას, რომ იწყებ ჯერ მთავარია ჯვარი ააწყო და შემდეგ უკვე სხვანაირად შეუდგე სწრაფად აწყობას“,– გვიხსნის ალბერტი.



მეორეკლასელ ალბერტს მათემატიკა უყვარს, თუმცა მომავალში სპიდკუბერობასთან ერთად პედიატრობასაც აპირებს. ძალიან უნდა, ახალციხის ციხეზე, რუბიკის კუბის სწრაფად აწყობაში საერთაშორისო კონკურსი მოაწყოს და კიევიდან ორი ცნობილი სპიდკუბერი ჩამოიყვანოს.

„ამ ეტაპზე ფეისბუქით მოლაპარაკებას ვაწარმოებთ კიევში მცხოვრებ ორ პროფესიონალ სპიდკუბერთან, ესენი არიან ევგენი ბონდარენკო და მაქსიმ ჩენჩნევი. ძალიან გვინდა, რომ აქ ადგილობრივ ხელისუფლებას დაველაპარაკოთ და ასეთი კარგი კონკურსი მოვაწყოთ“,– ამბობს ზაქარია, ალბერტის მამა, - „სკოლის გახსნაც უნდა, სადაც კუბების აწყობას, საკუთარი მეგობრების გარდა, სხვებსაც ასწავლის.“

ალბერტს კიდევ ერთი ოცნებაც აქვს, - „ძალიან მინდა, რომ „ნიჭიერში“ გავიდე და ძალიან ცნობილი გავხდე“.



[ავტორი – მარიამ ბარძიმაძე,
ვიდეო – ნანა ინასარიძე ]