‘ოცეულო სდექ’– როგორ ართობს სახლში ‘გამოკეტილ’ შვილებს ახალციხელი ჯარისკაცი [ვიდეო]

მას შემდეგ რაც საქართველოში კორონავირუსის ეპიდემია გავრცელდა და საგანგებო მდგომარეობა გამოცხადდა, მოსახლეობა ძირითად დროს სახლში ატარებს. სწავლა გადაიდო, ონალინ გაკვეთილების მიუხედავად ბავშვები სახლში არიან და ბევრი თავისუფალი დროც რჩებათ.

უჩა მაჩაიძე თავდაცვის ძალების თანამშრომელია. მას შემდეგ, რაც ჯარი ყაზარმულ რეჟიმზე გადავიდა, ორი კვირით სახლში ყოფნა უწევს.
რამდენიმე დღის წინ კი უჩამ ფეისბუკის გვერდზე ვიდეოები გამოაქვეყნა - მამა კაპიტნის როლს თამაშობს, შვილები რიგითები არიან, უფროსისგან მიღებულ დავალებას პირნათლად ასრულებენ და დამალული ნაღმებიც მოძებნეს.



„რომ ვუყურებ ამ სიტუაციას, ხალხი დაზაფრულია და დეპრესიაშიც არიან. მინდოდა, რომ ჩემი ფესიბუკ მეგობრებისთვის პოზიტივი მეჩვენებინა და დავდე ჩვენი გართობის ვიდეოები. ძალიან ბევრი დადებითი შეფასება და კომენტარი მოჰყვა. ჩვენ სულ ასე ვერთობით ხოლმე. ჯარის ფორმებს ვაცმევ ბავშვებს და ვთამაშობთ“.

პატარა მანუჩარი შვიდი წლისაა, მამის სამსახური უზომოდ უყვარს და საკუთარი ჯარის ფორმაც აქვს. „კაპიტნის“ დავალებებს სიხარულით და მონდომებით ასრულებს.

„მე და მანუჩარი რომ დავიწყებთ თამაშს, მარიამს სხვა გზა არ აქვს ხოლმე, მარტო რომ არ დარჩეს ისიც თამაშობს და ძალიან ვხალისობთ“, - გვიყვება უჩა.

მანუჩარი ყველა მშობელს ურჩევს, რომ ზოგადად და განსაკუთრებით კი ასეთ პერიოდებში მეტი დრო დაუთმონ საკუთარ შვილებს და ყველასთვის სახალისო თამაშები მოიგონონ.

„მშობლებს ვურჩევდი, რომ რაც შეიძლება მეტი ყურადღება დაუთმონ ბავშვებს გაართონ, მთლად ნუ ჩაკეტავენ, იმიტომ რომ აუცილებელია გარეთ გაყვანაც. დილთ, გარეთ სუფთა ჰაერზე გასეირნება კარგია, თუკი ამის საშუალება არის. ჩვენ ახლა სავადმყოფოს ფერდი გვაქვს ფიჭვნარი და იქ გაგვყავს ხოლმე ბავშვები. ამ პერიოდში როცა ბევრი რამაა შეზღუდული, გადაადგლებებიც, ათასნაირ თამაშებს ვიგონებთ. ამას ვურჩევ სხვებსაც“, - ამბობს უჩა.

საქართველოში 24 მარტის მონაცემებით, კორონავირუსის 67 შემთხვევაა დაფიქსირებული, აქედან ცხრა პაციენტი უკვე გამოჯანმრთელდა. დაინფიცირებულთა შორის ხუთი, 14 წლამდე ბავშვია.

[მარიამ ბარძიმაძე, ახალციხე]