ცხრა წლის ხელმარჯვე ოსტატი ასპინძიდან [ვიდეო]

ფერადი ფურცებით, ქვებით, თიხით და სხვადასხვა საყოფაცხოვრებო ნივთებით ყვავილების, ქოთნების, ცხოველების, ფრინველების, მულტფილმის გმირების და სამკაულების გაკეთება მამამ ასწავლა. პირველად ოთხი წლის იყო, როცა ფერადი ფურცლებისგან ყვავილი გააკეთა და დედას აჩუქა. იხსენებს, რომ ფურცლების დაჭრაში მაშინაც მამა დაეხმარა.



„ჩვენს ფანჯარაზე ჩიტები სხდებიან ხოლმე, პურის ნამცეცებს ვაჭმევთ. ნიკოლოზი სულ აკვირდება როგორები არიან, რა ფერები აქვთ, რომ მერე თვითონაც ზუსტად ისეთი გააკეთოს“, – გვიყვება ნიკოლოზის მამა ლევან ლომიძე.



მესამე კლასის მოსწავლეს ყველაზ მეტად მაინც ცხოველების გამოძერწვა უყვარს. ამბობს, რომ მუზები ყველაზე ხშირად სკოლაში მოსდის, იქ დაწყებულ საქმეს კი ხანდახან სახლში ასრულებს: „ნებისმიერ გარემოში შემიძლია რომ ვიმუშაო, მიყვარს როდესაც ჩემი საყვარელი მულტფილმის გმირებს ვაკეთებ. ერთხელ, მაგალითად გარეთ ვიხედებოდი და დავინახე უპატრონო ძაღლი როგორ მიდიოდა, ხო და მეც ავდექი და მსგავსი ძალღლი გამოვძერწე“.

მეგობრებს ნიკოლოზის ნამუშევრები ძალიან მოსწონთ, ამიტომ ხშირად მათაც ჩუქნის: „ხანდახან მეკითხებიან ხოლმე როგორ ვაკეთებ და ვასწავლი რა როგორ უნდა გააკეთონ“.

მისი ნამუშევრების გამოფენა სკოლაში არაერთხელ მოეწყო. ბოლო გამოფენაზე კი ნიკოლოზმა 300–მდე ნამუშევარი გაიტანა. თუმცა მის გაკეთებულ ყვავილებს, ქოთნებსა და თოჯინებს რეგიონში თითქმის ყველა გამოფენაზე შეხვდებით. ამბობს, რომ ხშირად მის ნივთებთან ერთად გამოფენებზე დედას და მამას გაკეთებულ ნივთებსაც შეხვდებით. ნიკოლოზის მამა ხელოსანია, დედა მაკა ბიბილაშვილი კი მკერავი.

ცხრა წლის ხელმარჯვე ოსტატი საკუთარ კოლექციას სულ უფრო მეტ ნივთს მატებს: „უკვე იმდენი მაქვს, რომ სახლში ვეღარ ეტევა“, – ამბობს სიცილით.

მესამე კლასის მოსწავლის საყვარელი საგანი, რა თქმა უნდა, ხელოვნებაა. დადის მუსიკაზე და ცეკვაზეც, ასევე უყვარს ფეხბურთი და ამბობს, რომ „ამ მიმართულებით შესაძლოა მომავალში სერიოზულად დაკავდეს“.



[მარიამ ბარძიმაძე, ნანა ინასარიძე – ასპინძა]