ახალციხის გერბსა და დროშაზე საბოლოო დეტალები თანხმდება

ახალციხის სიმბოლიკებს ქალაქის მერიასა და საკრებულოში ჯერ ვერ იყენებენ. მიუხედავად იმისა, რომ კომისიამ გერბი და დროშა 18 ნოემბერს დაამტკიცა, ავტორი ნანა ნათენაძე, ჰერალდიკის საბჭოსთან საბოლოო დეტალებს ჯერ კიდევ ათანხმებს.

„შესწორებული ვერსია გადაგზავნილი მაქვს, ალბათ მომავალ კვირაში პასუხსაც მივიღებთ“, – ამბობს სიმბოლოების ავტორი ნანა ნათენაძე.

მისი თქმით, იდეა უკვე დამტკიცებულია და მნიშვნელოვანი აღარფერი შეიცვლება: „ლომი, ციხე და უკან ჯვარი იგივე რჩება. უბრალოდ, ლომს რომ ერთი ვერსიის მიხედვით გასაღები ხელში უჭირავს, შესწორებული ვერსიით ეს გასაღები გვერდზე იქნება“.

ახალციხის საკრებულოს თავმჯდომარის მოადგილე და ახალციხის ჰერალდიკის კომისიის თავმჯდომარე თამარ გოგოლაძეც ამბობს, რომ ამ დროისთვის საბოლოო დეტალებს ათანხმებენ: „ვადა არ გვაქვს, მაგრამ რაც უფრო სწრაფად დასრულდება ეს პროცესი, მით უკეთესი იქნება“.
საბოლოოდ შეთანხმებული ვერსიის დამტკიცება საჭირო აღარ იქნება.

შეგახსენებთ, რომ ექვსი თვის განმავლობაში გერბისა და დროშის შესარჩავად კონკურსი სამჯერ გამოცხადდა. ბოლოს შესული შვიდი ნამუშევრიდან კომისიამ ნანა ნათენაძის გერბი და დროშა მოიწონა.

[თამუნა უჩიძე, ახალციხე]