ახალციხის ციხეზე 26 მაისისადმი მიძღვნილი ღონისძიებები დაიწყო [Video]

„მივულოცავ ყველას დღევანდელ დღეს და გამთლიანებას ვუსურვებ საქართველოს. 100 წლის იუბილესადმი მიძღვნილი ღონისძიებები ახალციხეში გრანდიოზულად აღინიშნება, ველოდებით მომღერლებს თბილისიდან და იმედი მაქვს, რომ ამ ღონისძიებებით ყველა კმაყოფილი დარჩება“, – განაცხადა ახალციხის მერმა ზაზა მელიქიძემ.

მერის გამოსვლის შემდეგ ციხეზე დაგეგმილი სხვადასხვა ღონისძიებები დაიწყო. საგარეო საქმეთა სამინისტროს ორგანიზებით გაცოცხლდა ძველი ქართული საკვირაო ბაზრობა. საიუბილეო თემატიკაზე გაიმართა თეატრალური წარმოდგენა, ასევე, დაიწყო შეჯიბრი ნარდსა და ჭადრაკში. ციხის ტერიტორიაზე გამოფენილია ხალიჩა–ფარდაგები, ასევე, ახალციხის სამხატვრო სკოლის მოსწავლეების ნამუშევრები.

საქართველოს დამოუკიდებლობის დღისადმი მიძღვნილ ღონისძიებებს ახალციხეში 21:00 საათზე გრანდიოზული ფეიერვერკი დაასრულებს.



[ლუბა გიორგაძე, ნანა ინასარიძე, ახალციხე]