გამამტყუნებელი ვერდიქტი ცოლის მკვლელობისთვის – იმიტირებული პროცესი ახალციხეში

მოსამართლის, პროკურორის, ბრალდებულის, ადვოკატის, ნაფიცი მსაჯულებისა და მოწმეების როლები სამცხე–ჯავახეთის უნივერსიტეტის იურიდიული ფაკულტეტის სტუდენტებმა მოირგეს. მათ სისხლის სამართლის კოდექსის 108–ე მუხლით გათვალისწინებული დანაშაულის ჩადენისთვის ყოფილი პოლიციელი გაასამართლეს.

პროკურორის მტკიცებით ბრალდებულმა საცოლე განზრახ მოკლა. ბრალდებულის ადვოკატი კი ირწმუნება, რომ რეალურად უბედური შემთხვევა მოხდა: „ყოფილი პოლიციელი იყო, იარაღის ხმარება კარგად იცოდა და თავის საცოლესაც ასწავლიდა. ერთ–ერთი ასეთი ვარჯიშის დროს კი ტყვია შემთხევით გაუვარდა და ქალს მოხვდა“.

სხდომაზე მოწმეების დაკითხვისა და წერილობითი მტკიცებულებების გამოკვლევის შემდეგ ნაფიცმა მსაჯულებმა გამამტყუნებელი ვერდიქტი გამოიტანეს.

იმიტირებული პროცესის მონაწილე სტუდენტები იურიდიული დახმარების ბიუროში სტაჟირებას გადიოდნენ.

"ეს ერთსემესტრიანი სატაჟრების საბოლოო შეჯამება იყო. მიუხედავად იმისა, რომ მათ პირველად მოუწიათ სასამართლო დარბაზში გამოსვლა, თავი ყველაფერს მაინც კარგად გაართვეს“, – ამბობს სამცხე–ჯავახეთის იურიდიული დახმარების ბიუროს ხელმძღვანელი დავით ზარიძე.

მისივე თქმით, იურიდიული ფაკულტეტის მეოთხე კურსის სტუდენტებისა და ასევე მაგისტრანტების ერთსემესტრიანი სტაჟირება პროექტ „იურიდიული კლინიკის“ ფარგლებში ხორციელდება. ამისთვის კი სამცხე–ჯავახეთის სახელმწიფო უნივერისტეტსა და იურიდიული დახმარების ბიუროს შორის მემორანდუმი გაფორმდა.

[ლუბა გიორგაძე, ახალციხე]