უფლებადამცველების ანგარიში მოსახლეობას

სახალხო დამცველის აპარატის წარმომადგენელმა სამცხე-ჯავახეთში არმენ მარანგოზიანმა 2013 წელში ადამიანების უფლებრივ მდგომარეობაზე ისაუბრა, იურიდიული დახმარების სამსახურის სამცხე- ჯავახეთის ბიუროს ხელმძღვანელმა დავით ზარიძემ კი 2014 წელი შეაჯამა.

მარანგოზიანის ანგარიშში აქცენტი ეროვნული უმცირესობების უფლებრივ მდგომარეობაზე გაკეთდა. მისი თქმით, ჯერ კიდევ გადაუჭრელია ეთნიკური უმცირესობების პოლიტიკურ, კულტურულ და საზოგადოებრივ ცხოვრებაში სრულფასოვანი მონაწილეობის საკითხი. ასევე, უმცირესობები მცირე რაოდენობით არიან წარმოდგენილი ცენტრალური ხელისუფლების დონეზე, ასევე, სხვადასხვა პოლიტიკური პარტიების მმართველ რგოლებში.

„ქვემო ქართლსა და სამცხე-ჯავახეთში მცხოვრები მოსახლეობის დიდი ნაწილი საქართველოს საინფორმაციო არხების მიერ ბუნდოვნად არის ინფორმირებული საქართველოში მიმდინარე მოვლენების შესახებ, რაც ნეგატიურად აისახება სამოქალაქო ინტეგრაციის პროცესზე“, - ვკითხულობთ მარანგოზიანის ანგარიშში.

ამავე ანგარიშში გამახვილებულია ყურადღება განათლების საკითხზეც: „ეროვნული უმცირესობების ენებზე სწავლების მქონე სკოლებისთვის არ არსებობს ქართული სახელმძღვანელოების მშობლიურ ენაზე კვალიფიციური თარგმანი“.

რაც შეეხება იურიდიული დახმარების ბიუროს ანგარიშს, ასე გამოიყურება: სისხლის სამართლის საქმეების რაოდენობა - 357; სისხლის სამართლებრივი დევნა შეწყდა 11 საქმეზე; განრიდება გაფორმდა 23-ზე; ბიუროში შესული სქმეებიდან მძიმე იყო 2, ნაკლებად მძიმე კი 21; მიმდინარე წლის განმავლობაში ბიუროში მომზადდა 188 სამართლებრივი დოკუმენტი; იურიდიული კონსულტაცია გაუწიეს 448 მოქალაქეს;

ზარიძის განცხადებით, ბიუროში შესული საქმეების რაოდენობა თითქმის იგივეა, რაც გასულ წლებში იყო.

[თამუნა უჩიძე, ახალციხე]