იურიდიული დახმარების სამსახურმა მუშაობის ანგარიში წარადგინა

შეხვედრა დღეს, ახალციხის დემოკრატიული ჩართულობის ცენტრში შედგა. იგი იურიდიული დახმარების სამსახურის მიერ 150 000–ე უფასო სამართლებრივი კონსულტაციის წარმატებით ჩატარებას მიეძღვნა.

სამცხე–ჯავახეთის იურიდიული დახმარების სამსახურის ბიუროს უფროსმა დავით ზარიძემ ბოლო ათი წლის განმავლობაში სამსახურის მიღწევებზე და იმ პროექტებზე ისაუბრა, რომელიც ევროკავშირის დახმარებით განხორციელდა.

იურიდიული დახმარების სამსახური საქართველოში 2007 წლიდან ფუნქციონირებს. იგი ეწევა უფასო იურიდიულ კონსულტაციებს, ამზადებს იურიდიულ დოკუმენტებს, ახორციელებს სასამართლო წარმომადგენლობას. იურიდიული კონსულტაციები ყველასათვის უფასოა, სოციალურად დაუცველებს კი შეუძლიათ მათ იურიდიული დოკუმენტების მომზადებისთვისაც მიმართონ.

სამცხე–ჯავახეთში სამსახურმა ფუნქციონირება 2010 წლიდან დაიწყო. ბიუროს შვიდი ადვოკატი და ერთი კონსულტანტი ჰყავს.
საქართველოში 12 იურიდიული დახმარების ბიურო და 7 საკონსულტაციო ცენტრია.





[მარიამ ბარძიმაძე, ახალციხე]