იურიდიული დახმარების ბიურო დაგროვილი პრობლემების გადასაჭრელად

შეხვედრის მიზანი იურიდიული დახმარების ბიუროს შესახებ მოსახლეობისათვის ინფორმაციის მიწოდება, ასევე სოფელში იმ დაგროვილი პრობლემების გაცნობა იყო, რომელიც ხალხს აწუხებს.

”მოსახლეობას უჭირს გადაადგილება, აქვს დაგროვილი პრობლემები, მაგრამ შეჩვეულია იმას, რომ თუ ფული არ გადაუხადა ადვოკატს, ისე ვერაფერს მოაგვარებს, ამიტომ ბევრ საკითხს ერთმანეთში გაკითხვის დონეზე ”აგვარებენ”, - ამბობს იურიდიული დახმარების ბიუროს უფროსის მოვალეობის შემსრულებელი და ადვოკატი ირაკლი ბარძიმაძე და ამატებს, რომ სწორედ ამიტომ აწყობს თვეში სამჯერ სხვადასხვა სოფელში გასვლით შეხვედრებს იურიდიული დახმარების ბიურო.

მუსხში ადვოკატები რამდენიმე ადგილზე გადანაწილდნენ და ყველა იმ მოსახლეს მოუსმინეს, რომელსაც რაიმე კითხვა ან პრობლმეა ჰქონდა.

”საკითხების უმრავლესობა, ძირითადად, სამოქალაქო დავებს ეხებოდა, ბევრს მიწასთან დაკავშირებით ჰქონდა პრობლემა, ზოგს ყანამდე მისასვლელ გზას უკეტავდნენ, ნაწილს კი წინაპრების გარდაცვალების შემდეგ ბინების გაფორმების შესახებ აინტერესებდა”, - აცხადებს ბარძიმაძე.

მისი თქმით, მოსახლეობას კვალიფიციური დახმარება გაეწია, თუმცა იყო საკითხები, რომელთა შესახებაც მათ ბიუროში მოსვლა სჭირდებოდათ: ”ასეთ ადამიანებს ჩვენ მისამართს ვუტოვებდით. რამდენიმე მათგანი მოვიდა კიდეც და სარჩელის გორმები მოვუმზადეთ”.

უახლოეს დღეებში იურიდიული დახმარების ბიურო გასვლით შეხვედრებს ადიგენის მუნიციპალიტეტში მოაწყობს. აქ პრობლემების გაცნობას აბასთუმნიდან დაიწყებენ.

სტატია დაფინანსებულია ევრაზიის თანამშრომლობის ფონდის მიერ „სამოქალაქო ინიციატივა დამოუკიდებელი მართლმსაჯულებისთვის“ პროექტის ფარგლებში, ამერიკის შეერთებული შტატების საერთაშორისო განვითარების სააგენტოს (USAID), აღმოსავლეთ- დასავლეთის მართვის ინსტიტუტისა (EWMI), და შვედეთის განვითარების სააგენტოს (Sida) მეშვეობით. შინაარსზე პასუხისმგებელია სამოქალაქო განვითარების სააგენტო (CiDA) და შესაძლებელია, შეხედულებები არ ემთხვეოდეს ევრაზიის თანამშრომლობის ფონდის, USAID-ის, ამერიკის მთავრობის ან აღმოსავლეთ-დასავლეთ მართვის ინსტიტუტის (EWMI) შეხედულებებს. სტატია მომზადებულია პროექტის „სისხლის სამართლის რეფორმების იმპლემენტაციის სტრატეგიის მონიტორინგი და ანალიზი უფასო იურიდიული დახმარების სფეროში“ ფარგლებში, რომელიც ხორციელდება სამოქალაქო განვითარების სააგენტოს (CiDA) მიერ.

[თამუნა უჩიძე, ახალციხე]