ტბაზე სეზონი ისე გაიხსნა, რომ დაზიანებული ინფრასტრუქტურა ვერ მოწესრიგდა

ახალციხის ხელოვნური ტბა ახალ სეზონს ისევ ჩაბნელებული შადრევნებით შეხვდა. დაკეტილია ტუალეტიც, ასევე, დაზიანებულია ფილების ნაწილი და წყალში შეჭრილი ხის სცენაც.

„ვიდრე უფრო დათბება და ხალხის რაოდენობა მოიმატებს ტბაზე, ყველა პრობლემას მოვაგვარებთ“, – ამბობს ააიპ „ახალციხის წყალმომარაგებისა და წყალანირების“ ხელმძღვანელი ჯემალ გიორგაძე, რომელსაც ტბის მოვლა–პატრონობა ევალება და ამატებს, რომ ტუალეტში უკვე ყველაფერი მოწესრიგებულია, – „მაგრამ ვერავინ ვნახეთ ვინც იქ იმუშავებს. ამიტომ ჯერ ისევ დაკეტილია. იმედია, მალე მოვძებნით ასეთ თანამშრომელს და ტუალეტს გავაღებთ“.

რაც შეეხება გათიშულ შადრევნებს გიორგაძის თქმით, თბილისიდან უკვე ჩამოიყვანეს ის სპეციალისტი, რომელმაც 2012 წელს ამ შადრევნების პროექტი გააკეთა: „ახლა ის ადგენს ხარჯთაღრიცხვას და ამის შემდეგ ტენდერი გამოცხადდება“.

მისივე თქმით, უახლოეს დღეებში კიდევ ერთი ტენდერი, ხელოვნურ ტბაზე წყალში შეჭრილი ხის სცენის მოსაწყობად გამოცხადდება: „მალე გადავალთ ტბაზე აშენებულ ადმინისტრაციულ შენობაშიც. აქ მხოლოდ ინვენტარი დაგვრჩა შესატანი. ასევე, გავაკეთებთ ტბის გარშემო ამოყრილ ფილებსაც“.

ახალციხის ხელოვნურ ტბაზე დასაქმებული შვიდი თანამშრომელია. ააიპ „ახალციხის ტბისა“ და მელიორაციის სამსახურის გაერთიანების შემდეგ ტბის ბიუჯეტი 233 000 ლარია.



[მარიამ ბარძიმაძე ახალციხე]