ახალციხის ტბაზე ველობილიკი დაზიანებულია

ახალციხის ხელოვნური ტბაზე, ადგილობრივები დასვენებისა და გართობის მიზნით იკრიბებიან. ეს ქალაქში ერთადერთი ადგილია, სადაც ველობილიკია გამოყოფილი, თუმცა მისი ნაწილი უკვე დაზიანდა.

„ველოთი ხშირად დავდივარ, დაზიანებულია ერთი მონაკვეთი და სულ ვფრთხილობ ამ მოსახვევში არ ჩავვარდე. დაახლოებით ორი თვეა ჩავარდნილია. ჯერ რამდენიმე ფილა იყო, ახლა უფრო ცუდი მდგომარეობაა“, - ამბობს ადგილობრივი სალომე ბოლქვაძე.

სალომეს მსგავსად, ახალციხის ტბაზე თითქმის ყოველ საღამოს სეირნობს დათო ტატალაშვილი. როგორც თავად ამბობს, დაზიანებული ბილიკი სახიფათო მხოლოდ ველოსიპედისტებისათვის არ არის: „ფეხი რომ ჩამივარდეს, ვინ მიშველის?! გვერდით შემდინარე წყლის მილია და სავარაუდოდ, წყლის წნევამ გამოუთხარა ძირი. ელემენტარული თანხა უნდა ამის გაკეთებას და ამდენი ხანი რატომაა ასე, არ ვიცი“.

ახალციხის ხელოვნური ტბის ტერიტორიის მოვლა–პარტრონობაზე პასუხისმგებელი მუნიციპალიტეტის ააიპი „ახალციხის წყალმომარაგება და წყალანირებაა“.

„ბეტონს ჩავასხამთ და ფილებსაც დავაგებთ. ორი ადგილია დაზიანებული და ორივეს გავაკეთებთ. კვირის ბოლომდე გავაკეთებთ ყველაფერს“, - ამბობს ააიპ „ახალციხის წყალმომარაგებისა და წყალანირების“ დირექტორი ჯემალ გიორგაძე.



[თორნიკე ზაზაძე, ახალციხე]