დაკეტილი ტუალეტი და გათიშული შადრევანი – როგორ შეხვდება ტბა ახალ სეზონს

ახალციხის ტბაზე, სადაც ყოველ საღამოს ბევრი ადამიანი იყრის თავს, უკვე მეექვსე წელია ტუალეტი დაკეტილია, ასევე, წლებია დაზიანებულია შადრევანიც. ახალციხის მერიაში აცხადებენ, რომ სეზონს დაახლოებით ერთ თვეში გახსნიან, მანამდე კი პრობლემებს მოაგვარებენ.

„ტუალეტში კანალიზაცია მწყობრშია, ასევე, ადგილზეა ყველა საჭირო ინვენტარი. წელს, ახალი სეზონიდან, ტბაზე დაკეტილ საპირფარეშოს აუცილბელად გავაღებთ“, – ამბობს ააიპ „ახალციხის წყალმომარაგებისა და წყალანირების“ ხელმძღვანელი ჯემალ გიორგაძე, რომელსაც, ტბის მოვლა–პატრონობო ევალება.

რაც შეეხება დაზიანებულ შადრევნებს, გიორგაძე ამბობს, რომ „მხოლოდ მცირე ხარვეზებია მოსაგვარებელი და სეზონის გახსნამდე ესეც აღმოიფხვრება“.

მისი თქმით, ახალ სეზონზე დამსვენებლებს ტბაზე თევზაობაც შეეძლებათ, ამისთვის თევზებს დაამატებენ. ასევე, ტბაზე არსებულ რვა ნავთან ერთად, იმუშავებს წყლის ველოსიპედებიც: „ახალ ველოსიპედებს შემოვიყვანთ, თუმცა, რამდენს ჯერ ზუსტად არ ვიცით“.

მომავალი თვიდან ტბის ადმინისტრაცია მუშაობას ახალ შენობაში გააგრძელებს. აქ სარემონტო სამუშაოები უკვე დასრულდა და ახლა მხოლოდ ინვენტარით აღჭურვას ელოდებიან.

ახალციხის ხელოვნურ ტბაზე დასაქმებული რვა თანამშრომელია. წელს, ტბის მოვლა–პატრონობისთვის გამოყოფილი 53 000 ლარია. თემისა და ქალაქის გაერთიანებასთან ერთად, მიმდინარე წელს ააიპ „ახალციხის ტბა“, მელიორაციიის სამსახურთან გააერთიანეს. ააიპ „ახალციხის წყალმომარაგებასა და წყალანირებას“ მუნიციპალიტეტის სარწყავი სისტემების მოწესრიგებასთან ერთად, ტბის მოვლა–პატრონობაც დაავალეს.

[ლუბა გიორგაძე, ახალციხე]