ახალციხეში, სკვერებში სკამები და ატრაქციონებია დაზიანებული [Photo]

ხელოვნურ ტბასა და ცენტრალურ პარკში, ასევე, თამარაშვილისა და ცხრა აპრილის ქუჩებზე სკვერებში სკამებია დაზიანებული. გარდა ამისა, მცირე ზომის ატრაქციონებია დაზიანებული ცენტრალურ პარკსა და ცხრა აპრილის ქუჩაზე.

"გაფუჭდება თუ არა ატრაქციონები, მაშინვე უნდა შეაკეთოს მერიამ, რომ ის უსაფრთხო იყოს ბავშვებისთვის. მოსახლეობაც უნდა გაუფრთხილდეს და არ უნდა დააზიანონ", – ამბობს ახალციხეში მცხოვრები ნანა მიქელაძე, რომელსაც ორი წლის ბავშვი პარკში თითქმის ყოველდღე გამოჰყავს.

ბავშვების უსაფრთხოებაზე საუბრობს, ადგილობრივი სულხან მელაძეც: "ბავშვი ხშირად გამომყავს პარკში, მაგრამ ეს ატრაქციონები პატარებისთვის საშიშია. ხელისუფლების მხრიდან ამას ყურადღება უნდა ექცეოდეს".

ასევე, სახიფათოა ახალციხის ხელოვნურ ტბაზე წყალში შეჭრილი ხის სცენაც. რკინის კონსტრუქციაზე ხის ზედაპირი, დაახლოებით, ერთი წელია ჩავარდნილია.

"ტბაზე გატეხილ სკამებს უახლოეს დღეებში შევაკეთებთ. ხის მცირე სცენის ხარჯთაღრიცხვა კი უკვე გაკეთებული გვაქვს. 10 000 ლარია ამისთვის გაწერილი. სცენის განახლება მაისის ბოლომდე იქნება შესაძლებელი", – ამბობს ააიპ "ახალციხის წყალმომარაგებისა და წყალანირების" ხელმძღვანელი ჯემალ გიორგაძე, რომელსაც, ტბის მოვლა–პატრონობო ევალება.

რაც შეეხება სკვერებში დაზიანებულ სკამებსა და ატრაქციონებს, ახალციხის მერიაში აცხადებენ, რომ უახლოეს დღეებში შეკეთდება: "ეს ყველაფერი უკვე შესწავლილი გვაქვს და მალე გავაკეთებთ".


ცხრა აპრილის ქუჩა


ცხრა აპრილის ქუჩა


ცენტრალური პარკი


ცენტრალური პარკი


თამარაშვილის ქუჩა


სცენა ახალციხის ტბაზე





[ნანა ინასარიძე, ახალციხე]