ახალციხეში ადგილობრივი ხელისუფლებისა და მოქალაქეების თანამშრომლობაზე იმსჯელეს

ადგილობრივ თვითმმართველობის საქმიანობაში საზოგადოების ჩართულობის გაზრდის მიზნით დღეს, 29 სექტემბერს, დემოკრატიული ჩართულობის ცენტრში საია–ს გორის ოფისის წარმომადგენლებმა შეხვედრა გამართეს.

შემაჯამებელ შეხვედრაზე არასამთავრობო სექტორმა, პედაგოგებმა, სტუდენტებმა და მედიის წარმომადგენლებმა, ადგილობრივი თვითმმართველობის წარმომადგენლებს ის პრობლემები და რეკომენდაციები გააცნეს, რაზეც გასულ შეხვედრებზე მსჯელობდნენ.

„მუნიციპალიტეტის წარმომადგენლებთან ერთად ვიმსჯელეთ რა პრობლემებს ხედავს მოსახლეობა ჩართულობის თვალსაზრისით და როგორ უნდა გამოიყენონ რეკომენდაციები. ჩვენ კვლავ განვაგრძობთ მსგავს შეხვედრებს, რომლებიც კონკრეტული მიმართულებებით დაიგეგმება. ეს შეეხება ინფრასტრუქტურულ პროექტებს, სოციალურ პროგრამებს, ასევე ბიუჯეტის განხილვასა და საჯარო მოხელეთა კონკურსის ჩატარების წესს“,– განმარტავს საია–ს გორის ოფისის ხელმძღვანელი ქეთევან ბებიაშვილი.

შეხვედრას ქალაქ ახალციხის საკრებულოს თავმჯდომარე კახა ბერიძე ესწრებოდა. მისი თქმით, თვითმმართველობის საქმიანობის გამჭვირვალობა საზოგადოებაზეა დამოკიდებული: „ძალით მოსახლეობას ვერ ჩავრთავთ, მათგან უნდა იყოს ინიციატივა. ჩვენ მაქსიმალურად გახსნილები ვართ“.
პროექტი „მოქალაქეების თანამშრომლობა ადგილობრივი თვითმმართველობის ორგანოების გადაწყვეტილების მიღების პროცესში: ევროკავშირის გამოცდილების გაცნობა“ 2014 წლის 1 მაისს დაიწყო და 31 აგვისტოს დასრულდა. თუმცა, ქეთევან ბებიაშვილი ამბობს, რომ შეხვედრებს კვლავ განაგრძობენ.

პროექტი ორ ქვეყანაში: საქართველოსა და სომხეთში, სომხეთის ახალგაზრდა იურისტთა ასოციაციის, საქართველოს ახალგაზრდა იურისტთა ასოციაციისა და არასამთავრობო ორგანიზაცია „აგორა ცე“–ს პარტნიორობით განხორციელდა. პროექტს ჩეხეთის რესპუბლიკის საგარეო საქმეთა სამინისტრო აფინანსებდა.

[თინათინ ზაზაძე, ახალციხე]