პარლამენტის შენობასთან „თეთრი ხმაურის მოძრაობის“ აქცია დასრულდა

ფოტო: რადიო თავისუფლება

13 მაისს “თეთრი ხმაურის მოძრაობის” მიერ ორგანიზებული აქცია რომელიც დაახლოებით ათი საათი გრძელდებოდა დასრულდა. აქციის მონაწილეები პარლამენტის შენობის მიმდებარე ტერიტორიას ტოვებენ. ტერიტორია დატოვა სპეციალური დანიშნულების რაზმმაც.

ადგილზე ამ დრომდე რჩებიან სამართალდამცავები და კონტრაქციის მონაწილეების ნაწილი.

„თეთრი ხმაურის მოძრაობის“ აქციის ორგანიზატორები აცხადებენ, რომ ერთი კვირის განმავლობაში დააკვირდებიან, როგორ წავა პროცესები, შაბათს კი ორგანიზებული და უფრო დიდი აქცია გაიმართება.

შეგახსენებთ, რომ დაახლოებით ერთი საათის წინ [00:21] აქციის მონაწილეებს შს მინისტრი გიორგი გახარია შეხვდა. მინისტრმა პარლამენტთან მიმდინარე აქციის მონაწილეებს ბოდიში მოუხადა.

გიორგი გახარიას განმარტებით, ის ხვალ, 14 მაისს დილის 10 საათზე აქციის წარმომადგენელბს შეხვდება და ყველა საკითხს განიხილავს მათთან ერთად.

შეგახსენებთ, რომ თბილისში, პარლამენტის შენობის წინ აქცია 12 მაისს დაიწყო და მეორე დღესაც გაგრძელდა. “თეთრი ხმაურის მოძრაობის” ორგანიზებით ახალგაზრდები ქუჩაში მას შემდეგ გამოვიდნენ, რაც პოლიციამ კლუბებში, “ბასიანი” და “გალერი”, სპეცოპერაცია ჩაატარა და რვა ნარკორეალიზატორი დააკავა. აქციის მონაწილეები ითხოვდნენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.

[sknews.ge]