შს მინისტრმა აქციის მონაწილეებს ბოდიში მოუხადა

გიორგი გახარიამ პარლამენტთან შეკრებილ აქციის მონაწილეებს რამდენიმე წუთის წინ მიმართა. მინისტრმა ბოდიში მოიხადა იმ სამართალდამცველების სახელითაც, რომლებმაც "ბასიანის" და "გალერის" სტუმრებს სიტყვიერი და ფიზიკური შეურაცხყოფა მიაყენეს და უფლებამოსილებას გადაამეტეს.

"უკვე მეორე დღეა, თქვენი გამოხატვის თავისუფლებას ხელი არ შეშლია. ასევე იცით, რომ დღეს აქ თითოეული პოლიციელი ზრუნავდა თქვენს უსაფრთხოებაზე. იმისთვის, რომ ჩვენ ყველამ მივაღწიოთ ჩვენს მიზანს, რომელიც გახლავთ, რომ ერთობლივად ვიპოვოთ გამოსავალი, საკმაოდ რთული ამოცანებიდან, რომელიც ჩვენს წინაშე დგას, უნდა გადავინაცვლოთ სამუშაო რეჟიმში", - განაცხადა გიორგი გახარიამ.

გიორგი გახარიას განმარტებით, ის ხვალ, 14 მაისს დილის 10 საათზე აქციის წარმომადგენელბს შეხვდება და ყველა საკითხს განიხილავს მათთან ერთად.

ორგანიზატორებმა განაცხადეს, რომ აქციების გამართვა შაბათამდე შეწყდება, მანამდე კი ხელისუფლებასთან მოლაპარაკებებს აწარმოებენ. იმ შემთხვევაში, თუ მათი მოთხოვნები არ დაკმაყოფილდება აქციებს კვლავ გააგრძელებენ.

[sknews.ge]