რუსთაველის გამზირზე კონტრაქციების მონაწილეები პოლიციის კორდონების გარღვევას ცდილობენ

ფოტო :on.ge

პარლამენტის შენობის წინ დაძაბულობაა. კონტრაქციის მონაწილეები პარლამენტის შენობასთან სამართალდამცველებმა არ გადაუშვეს. პოლიციელები საავტომობილო გზის გასწვრივ იმყოფებიან და კორდონი აქვთ გაკეთებული.

დაძაბულობის დროს რამდენიმე პირიც დააკავეს. აქციის მონაწილეები პარლამენტთან მიმდინარე აქციას აპროტესტებენ და როგორც ისინი აცხადებენ, ითხოვენ 9 აპრილის მემორიალთან გადასვლას და სანთლების დანთებას აპირებენ.

მათი თქმით, გაღიზიანება გუშინ 12 მაისს “თეთრი ხმაურის მოძრაობის” მიერ ორგანიზებული აქციაზე, ცხრა აპრილის მემორიალზე მოცეკვავე აქციის მონაწილეებმა გამოიწვია.

გოგონამ, რომელიც მემორიალზე ცეკვავდა საზოგადოებას ბოდიში მოუხადა და განაცხადა, რომ მისი ქმედება საზოგადოების ნაწილმა არასწორად გაიგო.

ამ დროისთვის პარლამენტთან რუსთაველის გამზირზე გზა გადაკეტილია.

შეგახსენებთ, რომ დაახლოებით ერთი საათის წინ სამართალდამცველებმა კონტრაქციის ერთ–ერთი მონაწილე გიორგი გაბედავა დააკავეს.

თბილისში, “თეთრი ხმაურის მოძრაობის” მიერ ორგანიზებული აქციების სერია, მეორე დღეა გრძელდება. ახალგაზრდები ქუჩაში მას შემდეგ გამოვიდნენ, რაც პოლიციამ კლუბებში, “ბასიანი” და “გალერი”, სპეცოპერაცია ჩაატარა და რვა ნარკორეალიზატორი დააკავა.აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.

[sknews.ge]