პრემიერ-მინისტრი გიორგი კვირიკაშვილი სპეციალურ განცხადებას გააკეთებს

მთავრობის მეთაური ბრიფინგს 21:00 საათზე გამართავს.

დღევანდელ აქციაზე “თეთრი ხმაურის მოძრაობის” ერთ–ერთმა ორგანიზატორმა ბექა წიქარიშვილმა საჯაროდ მიმართა ხელისუფლებას, რათა პოლიტიკური განცხადება გაეკეთებინა.

"თუ პოლიცია არ დაგვიცავს, გვაქვს საკმარისი გამოცდილება, რომ ჩვენ თავად დავიცვათ საკუთარი თავი, – განაცხადა აქციაზე “თეთრი ხმაურის მოძრაობის" წევრმა ბექა წიქარიშვილმა.

კონტრაქციის მონაწილეებმა პარლამენტთან მიმდინარე აქციის მონაწილეებს ერთსაათიანი ვადა მისცეს, რათა მათ დატოვონ ტერიტორია, წინააღმდეგ შემთხვევაში კი არ გამორიცხავენ, რომ რადიკალურ ზომებს მიმართონ.

სამართალდამცავებს, დაპირისპირებულ მხარეებს შორის ცოცხალი კორდონი აქვთ გაკეთებული.

შეგახსენებთ, რომ თბილისში, რუსთაველის გამზირზე “თეთრი ხმაურის მოძრაობის” მიერ ორგანიზებული აქციების სერია, მეორე დღეა გრძელდება. ახალგაზრდები ქუჩაში მას შემდეგ გამოვიდნენ, რაც პოლიციამ კლუბებში, “ბასიანი” და “გალერი”, სპეცოპერაცია ჩაატარა და რვა ნარკორეალიზატორი დააკავა.აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.


[sknews.ge]