კვირიკაშვილი:' კატეგორიულად მიუღებელია და დაუშვებელია რაიმე სახის დაპირისპირება და საზოგადოების გახლეჩა'

საქართველოს პრემიერ–მინისტრი გიორგი კვირკაშვილი რუსთაველის გამზირზე განვითარებულ მოვლენებს ეხმაურება და მოუწოდებს სამართალდამცავ ორგანოებს მაქსიმალურად გააძლიერონ უსაფრთხოების ღონისძიებები.

პრემიერმა აქციის ორივე მხარეს მდგომებს მიმართა და გაერთიანებისკენ მოუწოდა.

“გუშინ დილიდან ჩვენს გუნდში მიმდინარეობდა იმ საკითხების აქტიური განხილვა, რაზეც ჩვენი ახალგაზრდები, ჩვენი შვილები დღეს და გუშინ ქუჩაში, ამ შენობიდან რამდენიმე მეტრის დაშორებით ასე ემოციურად საუბრობდნენ. გუშინ საღამოსვე კახა კალაძემ ჩვენი გუნდის სახელით გააკეთა განცხადება სადაც მკაფიოდ იქნა გამოხატული ჩვენი პოზიცია დღევანდელ აქტუალურ საკითხებთან დაკავშირებით და მოუწოდა საზოგადოებას გაერთიანებისკენ იმ უმძიმეს დანაშაულთან ბრძოლაში, რასაც ნარკოტიკების რეალიზაცია ჰქვია და რასაც ბოლო პერიოდში არაერთი ადამიანის ციცოხცლე შეეწირა”, – განაცხადა პრემიერ–მინისტრმა.

შეგახსენებთ, რომ დღევანდელ აქციაზე “თეთრი ხმაურის მოძრაობის” ერთ–ერთმა ორგანიზატორმა ბექა წიქარიშვილმა საჯაროდ მიმართა ხელისუფლებას, რათა პოლიტიკური განცხადება გაეკეთებინა.

პრემიერს ბრიფინგზე სპეცოპერაციასთან დაკავშირებით განმარტება არ გაუკეთებია.

რუსთაველის გამზირზე “თეთრი ხმაურის მოძრაობის” მიერ ორგანიზებული აქციების სერია, მეორე დღეა გრძელდება. ახალგაზრდები ქუჩაში მას შემდეგ გამოვიდნენ, რაც პოლიციამ კლუბებში, “ბასიანი” და “გალერი”, სპეცოპერაცია ჩაატარა და რვა ნარკორეალიზატორი დააკავა.აქციის მონაწილეები ითხოვენ პრემიერისა და შინაგან საქმეთა მინისტრის გადადგომას, ასევე, რეპრესიული ნარკოპოლიტიკის შეცვლას.

[sknews.ge]