სოფელ არალში მცხოვრებლები მერიას სარწყავი მილების შეკეთებას სთხოვენ

სოფელ არალში, იმ ადგილზე, სადაც წლებია ყანები ვეღარ ირწყვება, ადგილობრივები აღარაფერს თესავენ.

„წელს აღარ ვიცით როგორ მოვიქცეთ, მოვნახათ მიწები თუ არა. თუ მერია დაზიანებულ მილებს არ გაგვიკეთებს, იქ ყანების დამუშავებას აზრი არ აქვს, მაინც არაფერი მოვა“, – აცხადებენ არალში მცხოვრებლები.

როგორც არალში, სათემო კავშირ „თანასწორობის“ თავმჯდომარე გიორგი ფეიქრიშვილი ამბობს, მათ მილების შეკეთების თხოვნით ადიგენის მერიას უკვე მიმართეს: „ველოდებით პასუხს, ამ დღეებში შეგვატყობინებენ“.

ადიგენის მუნიციპალიტეტის მერიის ინფრასტრუქტურის სამსახურში აცხადებენ, რომ არალში დაზიანებული მილების საქმეს სწავლობენ:
„მომავალ კვირაში დავასრულებთ შესწავლას. ჯერ ვერაფერს გეტყვით გავეკეთებთ თუ არა, ან რამდენი ლარი დასჭირდება ამ პრობლემის გადაჭრას“, – ამბობს ადიგენის მუნიციპალიტეტის მერიაში ინფრასტრუქტურის სამსახურის უფროსი გოდერძი სხირტლაძე.

არალში, ე.წ. ყორუღების ტერიტორიაზე 150–მეტრიანი სარწყავი სისტემა „ბი–პის“ დაფინანსებით 2008 წელს, 18 000 ლარად გაკეთდა. ადგილობრივების თქმით, მილი მწყობრიდან სამი წლის წინ, წყალდიდობის გამო გამოვიდა. ამ დრომდე მილები მდინარე ქვაბლიანში ყრია.



[თამუნა უჩიძე, ადიგენი]