მოძველებული წყლის სისტემის გამო ვარხანში მილები სკდება

გუშინ, პირველ ოქტომბერს სოფელ ვარხნის ცენტრალურ გზაზე სასმელი წყლის მილი სამ ადგილზე იყო დაზიანებული, წყალი კი ცენტრალურ გზაზე გადმოდიოდა.

ააიპ „ადიგენის წყალმომარაგების“ დირექტორის მამუკა დემეტრაძის განმარტებით, ვარხნის სასმელი წყლის შიდა ქსელი 1968 წელს არის გაკეთებული და ძველი ლითონის მილები წნევას ვერ უძლებს: „ამორტიზირებულია მთლიანი სისტემა, ყოველ წამში, წუთში და საათში ზიანდება. შიდა დაქსელვებიც ზიანდება და ცენტრალურიც“.

მისი თქმით, ააიპ–ის თანამშრომლები მაქსიმალურად ცდილობენ უმოკლეს პერიოდში დაზიანება აღმოფხვრან: „გუშინ სისტემა დავცალეთ და მალევე შევაკეთეთ“.

ააპ–ის დირექტორის განმარტებით მსგავსი პრობლემაა სოფელ აბასთუმანშიც, რაც შეეხება ადიგენის დანარჩენ სოფლებს, იქ მდგომარეობა უკეთესია: „ზოგიერთ სოფელში სულ ახალი შიდა ქსელი გვაქვს. გასულ წლებში ვარხანში სათავე ნაგებობა და ცენტრალური მაგისტრალი გაკეთდა ახლა გასაკეთებელი შიდა ქსელია“.

ადიგენის მუნიციპალიტეტის მერის მოადგილე არსენ ბალახაშვილი ამბობს, რომ რადგან წინასაარჩევნო პერიოდია ბიუჯეტში ცვლილებებს ვერ შეიტანენ. მისი თქმით, ამ ეტაპზე იმდენი თანხაა გათვალისწინებული ბიუჯეტში, რამდენიც დაზიანებული მილების შესაკეთებლად შეიძლება დასჭირდეთ: „თანხა გვაქვს, მაგრამ ტენდერი უნდა გამოვაცხადოთ. გააჩნია სამუშაოების მოცულობას, ჩვენი თანამშრომლები გავლენ და შეისწავლიან, ჩავეტევით თუ არა ამ თანხაში ჯერ ვერ გეტყვით. ამ ეტაპზე ვარხნის ზედა უბანზე 200 მეტრიანი მონაკვეთია დაზიანებული, აზომეს და ვცდილობთ ეს მოვაგვაროთ და მოსახლეობას მივაწოდოთ წყალი“.



[თინათინ ზაზაძე, ადიგენი]