სოფელ ყვიბისში მეწყერისგან დაზიანებული წყლის მილი შეაკეთეს

ყვიბისის სათავე ნაგებობასთან დამეწყრილი ტერიტორია ააიპ–ი „ბორჯომის სოფლის წყლის“ თანამშრომლებმა გაწმინდეს. როგორც ააიპ–ის დირექტორმა გიორგი ოქრუაშვილმა განაცხადა, რთული რელიეფის გამო, გაწმენდითი სამუშაოები ერთი კვირა გაგრძელდა. ამ ეტაპზე მოსახლეობას სასმელი წყალი მიეწოდება, თუმცა, საათობრივად.

„გაიწმინდა ტერიტორია, დაზიანებული მილი შეკეთდა და დასუფთავდა ფილტრები“, – ამბობს გიორგი ოქროაშვილი.

მისი თქმით, დებეტის სიმცირის გამო მოსახლეობას სასმელ წყალთან ერთად, მდინარის წყალიც მიეწოდება: „არ არის წყალი საკმარისი, ამიტომ მდინარის წყალსაც ვურევთ. ყვიბისში არის ისეთი პერიოდი, როცა მდინარეები კი არა, სასმელ წყალს ღელეებიც რომ დაამატო, მაინც არ იქნება მოსახლეობისთვის საკმარისი“.

შეგახსენებთ, რომ ყვიბისის სასმელი წყლის სათავე ნაგებობასთან მეწყერი მარტის შუა რიცხვებში ჩამოწვა, რის გამოც ონკანებში ტალახიანი წყალი მოდიოდა. ადგილობრივები აცხადებენ, რომ სოფელში წყლის პრობლემა ხშირად აქვთ. განსაკუთრებით გაზაფხულზე.



[თინათინ ზაზაძე, ბორჯომი]