სოფელ რუსთავში სასმელი წყლისთვის ჭაბურღილს დაამონტაჟებენ

ასპინძის მერიამ, ინფრასტრუქტურის სამინისტროს დახმარებით, სოფელ რუსთავში სასმელი წყლის მიწოდებისთვის ორი პროექტი შეიმუშავა: ერთი სოფელ ოშორის მთებიდან ჩამონადენი წყლების შეკრება, მეორე კი მტკვრის სანაპიროზე ჭაბურღილის დამონტაჟება.

მერიაში აცხადებენ, რომ ოშორის წყლების შეკრების შემთხვევაში, ოშორელებს წყლის დებეტი მნიშვნელოვნად შეუმცირდებათ, ამიტომ მეორე პროექტის, ჭაბურღილის გაკეთება იგეგმება.

„გარემოს დაცვის სამინისტროს წარმომადგენლებმა ჩაატარეს კვლევები და აღმოჩნდა, რომ ოშორას ძალიან ვაზარალებთ, ამიტომ ყურადღება შედარებით ნაკლებად ხარჯიან პროექტზე, ჭაბურღილის მონტაჟზე შევაჩერეთ“, – ამბობს ასპინძის მუნიციპალიტეტის მერიის ინფრასტრუქტურის სამსახურის უფროსი ანზორ ალელიშვილი.

ოშორის მთებიდან წყლების შეკრება თვითმმართველობას 2 700 000 ათასი ლარი, ჭაბურღილის გაკეთება კი 1 800 000 ლარი დაუჯდება. თუმცა, სოფელში ადგილობრივები ამბობენ, რომ თუ ახლა თანხა დაიზოგება, მერიას მომავალში ჭაბურღილის შენახვაში მეტის გადახდა მოუხდება. თუმცა, ეს არაა ერთადერთი არგუმენტი რის გამოც რუსთაველები შერჩეული პროექტის განხორციელებას ეწინააღმდეგებიან.

„ძალიან ხარჯიანია ჭაბურღილი, რადგან ხშირად გამოდის მწყობრიდან, 1982 წელს ჩვენ გვქონდა დამონტაჟებული და ვერ იმუშავა, წყალს კარგად ვერ ქაჩავდა. ამის გამო სოფელი პერიოდულად უწყლოდ რჩებოდა, იმის გაკეთებას კი ფული სჭრიდებოდა“, – ამბობს სოფელ რუსთავში მცხოვრები არჩილ კახაძე.

ასევე, ადგილობრივები შიშობენ, რომ სოფელ რუსთავთან ახლოს „მტკვარი ჰესის“ მშენებლობის გამო, შესაძლოა, მდინარეში წყალი შემცირდეს, ჭაბურღილმა კი ამის გამო მუშაობა შეწყვიტოს.

„მტკვარს კალაპოტი შეუცვალეს, ვინ იცის, იქნე წყალი შეცოტავსდეს. როგორ უნდა ვიყოთ ჭაბურღილზე დამოკიდებულები?! თუ წყალი მთიდან არ გამოვიდა, სხვა ყველა გზა სტაბილური არ მგონია რომ იყოს“, – ამბობს რუსთავის მკვიდრი ნაიარა ივანიძე.

ადილობრივების პოზიცია ცნობილია ასპინძის მერიისთვის. სოფელ რუსთავის დეპუტატის თამაზ შავაძის თქმით, ვიდრე პროექტს დაამტკიცებენ მოსახლეობასთან შეხვედრებს გამართავენ: „მოვიფიქრებთ რაიმე ისეთს, რომ ჭაბურღილი არც მწყობრიდან გამოვიდეს და წყლის სიმცირის გამოც ადგილობრივებს პრობლემები არ შეექმნეთ“.



უკვე ერთი წელია, რუსთავში 155 ოჯახი სასმელი წყლის გარეშეა დარჩენილი. სოფელს სასმელი წყლის მიწოდება გასული წლის მაისში შეუწყდა. ადგილობრივებმა ეს ფაქტი ჰესისთვის გვირაბის გათხრას დაუკავშირეს. გვირაბი სოფელ საყუნეთიდან იჭრება და რუსთავის მიმდებარე ტერიტორიაზე უნდა გაიაროს. რუსთაველები სასმელი წყლის მიწოდების აღდგენას ერთი წელია ითხოვენ, მათ საპროტესტო აქციებიც გამართეს, ასევე, შეხვდენენ ჰესის ხელმძღვანელობას და ასპინძის მერსაც.

[ლუბა გიორგაძე, ასპინძა]