სოფელ რუსთავის მცხოვრებლები ასპინძაში საპროტესტო აქციას მართავენ

დღეს, 10 აგვისტოს ადგილობრივებმა საპროტესტო აქცია ჯერ სოფელ რუსთავში გამართეს, ახლა კი ასპინძის ადმინისტრაციული შენობის წინ იკრიბებიან.

„გამგებელთან შეხვედრას ვითხოვთ. სოფლის 70% ვეღარ სარგებლობს სასმელი წყლით. ასე მოგვიწევს, რომ ხალხი სოფლიდან გავასახლოთ“, – აცხადებს ასპინძის საკრებულოს დეპუტატი სოფელ რუსთავში ჯემალ იაკობიძე.

მისი თქმით, „მტკვარიჰესის“ ხელმძღვანელობა სოფლის მოსახლეობას დაპირდა, რომ ამ საკითხს შეისწავლიდა, თუმცა ადგილობრივებს ორგანიზაციიდან პასუხი ამ დრომდე არ მიუღიათ: „წერილი მოგვივიდა ამ საკითხზე ვმუშაობთო, სამი თვე გავიდა, მაგრამ სოფელში არავინ გამოჩენილა“.

ადგილობრივები პრობლემის მოგვარებაში დახმარებას ასპინძის გამგეობას სთხოვენ: „გამგეობაში გვითხრეს სოფელში არსებული წყალი უნდა გავანაწილოთო, მაგრამ ჯერ კიდევ არ გაუნაწილებით, ამ სიცხეებში წყალი საერთოდ არ გვაქვს. ის რაც არის რომ გაანაწილონ, საკმარისი მაინც არ იქნება, ამ პრობლემის გამო კი სოფელში ერთმანეთს ვუპირისპირდებით“.

შეგახსენებთ, რომ სოფელ რუსთავის მოსახლეობას მესამე თვეა სასმელი წყალი არ აქვს. ადგილობრივები ამბობენ, რომ სისტემა, რომლითაც სოფელი მარაგდებოდა „მტკვარი ჰესის“ მშენებლობისას დაზიანდა.

[თინათინ ზაზაძე, ასპინძა]