„მტკვარი ჰესის“ ხელმძღვანელობის განმარტება წყლის მიმართულების შეცვლაზე

„მტკვარი ჰესის“ საიტ–მენეჯერი გიორგი ლაკირბაია „სამხრეთის კარიბჭესთან“ განმარტავს, რომ 23 ივლისს წყალს მიმართულება მშენებლებმა შეუცვალეს, რადგან გვირაბის მშენებლობისას, ეს ჩვეულებრივი მოვლენაა.

„გვირაბი კეთდება და იმისათვის რომ წყალი უსაფრთხოდ გაგვეტარებინა დამატებითი „დრენაჟი“ გაკეთდა და ნაკადი ჩავუშვით. მერე აღმოჩნდა, რომ ცოტა მეტი წყალი მოვიდა და ნაშალი მასალა წამოიღო, თუმცა ეს ძალიან უმნიშვნელო იყო“,–აცხადებს „მტკვარი ჰესის“ საიტ–მენეჯერი გიორგი ლაკირბაია.

მისივე თქმით, მტკვარში არც ნაშალი მასალა ჩასულა და როგორც, სამშენებლო კომპანიისთვის და ისე გარემოსთვის ზიანი არ მიუყენებია. ამ დროისათვის კი სამუშაოები ჩვეულ რეჟიმში მიმდინარეობს.

შეგახსენებთ, რომ გუშინ 23 ივლისს ერთ–ერთმა თვითმხილვევლმა „მტკვარი ჰესზე“ წყლის ნაკადი გადაიღო, რომელიც იმ ადგილიდან გადმოდიოდა, საიდანაც არ უნდა გადმოსულიყო. მისივე თქმით, წყალს მდინარეში სამშენებლო მასალა ჩაჰქონდა.

გუშინვე, შემთხვევის შესახებ „მტკვარი ჰესის“ მშენებლობის დამკვეთ კომპანიაში „სამხრეთის კარიბჭესგან“ შეიტყვეს. "მტკვარი ჰესის" დირექტორის მოადგილე ბადრი მათოშვილი განმარტავდა, რომ ფოტო–ვიდეოზე ასახულ ტერიტორიაზე წყალი არ უნდა გადმოსულიყო.

აქ, გვირაბის სამშენებლო სამუშაოებს, შპს „ფერი“ ახორციელებს.

[sknews.ge]