სოფელი რუსთავი წელსაც სასმელი წყლის გარეშე რჩება

სოფელ რუსთავში ადგილობრივი თვითმმართველობა წყლის მისაყვანად მდინარე მტკვარზე ჭაბურღილის გაკეთბას გეგმავდა, თუმცა, ეს ვერსია მოსახლეობისთვის მიუღებელი აღმოჩნდა. ადგილობრივები აცხადებდნენ, რომ ჭაბურღილი მწყობრიდან მალე გამოვიდოდა და ამის გამო სოფელი ისევ უწყლოდ დარჩებოდა.

ასევე, გამოირიცხა სოფელ ოშორიდან რუსთავისთვის წყლის მიყვანის ვერსიაც. მოკვლევის შემდეგ გაირკვა, რომ საკმარისი წყალი ოშორასაც აღარ დარჩება.

„უკვე მოვიკვლიეთ ის ტერიტორიები, საიდანაც შესაძლებელი იქნებოდა წყლის გამოყვანა და მანდ შეჩერდა ყველაფერი. ჯერ არ ვიცით კიდევ რისი გაკეთება შეიძლება, შესაბამისად არც პროექტი გვაქვს და არც დაფინანსების წყაროები ვიცით“, – გვითხრეს რეგიონული განვითარებისა და ინფრასტრუქტურის სამინისტროში.

როდის გააგრძელებს სამინისტრო რუსთავში წყლის პრობლემის მოგვარებაზე მუშაობას, ან რა ვერსიები შეიძლება განიხილონ, უწყებაში ეს ჯერ არ იციან. თვითმმართველობაში კი ამბობენ, რომ ვიდრე რამე გადაწყდება, სოფელი ისევ ტყიდან ჩამომდინარე წყაროს წყლების იმედად იქნება.

„ტყიდან ჩამოსული წყლები ძალიან ცოტაა. ამიტომ ერთადერთი გზა ისაა, რომ ეს ცოტა წყალი გამანაწილებლის საშუალებით იმ 130–მდე ოჯახს მივუყვანოთ, რომელიც სოფელში მუდმივად ცხოვრობს. რეალურად ჯერ სხვა გზა არაა“, – ამბობს სოფელ რუსთავის დეპუტატი თამაზ შავაძე.

მისი თქმით, კიდევ ერთი ვერსია, რაზეც შესაძლოა სამინისტრომ და თვითმმართველობამ იმუშაონ, რუსთავში სოფელ ურავლიდან წყლის გაყვანაა: „მაგრამ ეს ძალიან ძვირი დაჯდება. ღირებულების გამო არც კი ვიცი საერთოდ ამ ვარიანტის განხილვა რამდენად შესაძლებელი იქნება“.

უკვე ერთი წელია, რუსთავში 155 ოჯახი სასმელი წყლის გარეშეა დარჩენილი. სოფელს სასმელი წყლის მიწოდება გასული წლის მაისში შეუწყდა. ადგილობრივებმა ეს ფაქტი ჰესისთვის გვირაბის გათხრას დაუკავშირეს. გვირაბი სოფელ საყუნეთიდან იჭრება და რუსთავის მიმდებარე ტერიტორიაზე უნდა გაიაროს. რუსთაველები სასმელი წყლის მიწოდების აღდგენას ერთი წელია ითხოვენ, მათ საპროტესტო აქციებიც გამართეს, ასევე, შეხვდნენ ჰესის ხელმძღვანელობას და ასპინძის მერსაც.

[ლუბა გიორგაძე, ასპინძა]