ახალგაზრდა პოლიტიკოს ლიდერთა სკოლა მონაწილეებს იწვევს

ახალგაზრდა პოლიტიკოს ლიდერთა სკოლის მიზანია გაზარდოს იმ ახალგაზრდების რიცხვი, რომლებიც საქართველოს ეროვნულ და ადგილობრივ დონეზე პოლიტიკური პროცესების მონაწილეები იქნებიან.

YPLS-ის კურსები ჩატარდება შაბათ-კვირას, ერთდროულად ორ ადგილას - ქუთაისსა და ახალციხეში. ექვსკვირიანი სემინარების განმავლობაში მონაწილეებს საშუალება ექნებათ გაიღრმავონ ცოდნა პოლიტიკური პროცესების შესახებ, მიიღონ სამოქალაქო და პოლიტიკური აქტივიზმისთვის საჭირო უნარები და ჩამოაყალიბონ ახალი ქსელები თანატოლებთან ერთად.

ასევე, ლექციები მოიცავს ისეთ საკითხებს, როგორიცაა ლიდერობის უნარები, პოლიტიკური კომუნიკაცია და კამპანია, მედია განათლება, პოლიტიკური პარტიები და იდეოლოგიები, ქალთა პოლიტიკური მონაწილეობა და ლიდერობა, პროექტის მენეჯმენტი, ფინანსების მოძიება, აქტიური მოქალაქეობა და სხვა.

მასში მონაწილეობის უფლება 17 წელს ზემოთ მოქალაქეებს შეუძლიათ. დაინტერესების შემთხვევაში მსურველებმა რეზიუმე და სამოტივაციო წერილი შემდეგ მისამართზე უნდა გააგზავნონ: ypls2013@gmail.com

”განცხადების შეტანის ბოლო ვადა 7 ივნისი იყო, მაგრამ ორი დღე კიდევ დაემატა და მსურველებს მისი გამოგზავნა 8 და 9 ივნისსაც შეეძლება. შერჩეულ კანდიდატებს დაუკავშირდებიან საბოლოო ვადიდან ერთი კვირის განმავლობაში, ტრენინგები კი 22 ივნისიდან დაიწყება და ახალციხეში ჩატარდება”, - ამბობს ახალგაზრდა პოლიტიკოს ლიდერთა სკოლის წარმომადგენელი ახალციხეში ჯაბა ნათენაძე.

იმ შემთხვევაში, თუ მონაწილეებს ტრენინგის ადგილამდე მგზავრობა და საცხოვრებელი ადგილის ხარჯები დასჭირდებათ ორგანიზატორები უზრუნველყოფენ.

დამატებითი ინფორმაციის ნახვა შემდეგ მისამართზე შეგიძლიათ: http://jobs.ge/58369/

[თამარ თოთაძე, ახალციხე]