ვის მოუწევს სამსახურის დატოვება ათასობით დამპალი წიგნის გამო

სტატია სათაურით ”რას მალავს ახალციხის ”საამაყო” ბიბლიოთეკა” ბიბლიოთეკის სარდაფში ათასობით დამპალი წიგნის შესახებ წერდა. სტატიაში ნათვამია, რომ ”ნაციონალების” მიერ სარდაფში ჩაყრილი წიგნების ბედით, არც ხელისუფლებაში მოსული ”ოცნება” დაინტერესდა. ”ქართული ოცნებიდან” მოსულმა სანდროშვილმა საკრებულოს თავმჯდომარის თანამდებობაზე ”ნაციონალების” წარმომადგენელი მალხაზ გიქოშვილი არჩევნების შემდეგ შეცვალა.

სანდროშვილის განცხადებით ის, რომ საკრებულოს ბიბლიოთეკა უყურადღებოდ ჰყავდა მიტოვებული სიმართლეს არ შეესაბამება.

- ”საკრებულომ შექმნა საინვენტარიზაციო კომისია და წლის ბოლოსთვის იმ ქონების აღწერას აკეთებდა, რომელიც მუნიციპალიტეტის საკუთრებაა, მათ შორის არის ბიბლიოთეკაც. როცა ბიბლიოთეკაში იყვნენ კომისიის წევრები და აღწერეს, მომახსენეს, რომ იქ წიგნებთან დაკავშირებით პრობლემები იყო”, - ამბობს სანდროშვილი და ამატებს, რომ მაშინვე მივიდა ბიბლიოთეკაში და წინგების მდგომარეობით დაინტერესდა.

მისივე თქმით, მან საკრებულოსთვის ხარჯთაღრიცხვის წარგენა ბიბლიოთეკის მენეჯერს თინათინ კაპანაძესა და ახალციხის კულტურის დაწესებულებათა გაერთიანების დირექტორს ბელა მოდებაძეს იმ დღესვე დაავალა: ” ეს იყო დაახლოებით ორი თვის წინ, მას შემდეგ ჯანმრთელობასთან დაკავშირებით პრობლემები შემექმნა, ასევე ორჯერ ქვეყნის დატოვება მომიხდა და მოვლენების განვითარებას თვალყური ვეღარ მივადევნე. ბავშვი არცერთია და არც მეორე, რომ რამდენჯერმე გამეორება დასჭირვებოდათ. უფრო მეტიც, მათ მანამდე უნდა მოემართათ ჩემთვის ამ საკითხის გამო, ვიდრე მე თავად ვნახავდი წიგნებს”.

სანდროშვილმა ამერიკაში მივლინებით ყოფნის დროს, ”სამხრეთის კარიბჭის” ვებ-გვერდიდან შეიტყო, რომ წიგნების ამბავი ჯერ კიდევ მოუგვარებელი იყო: ”გაკვირვებული ვიყავი, რადგან ისე იყო ამბავი გაშუქებული თითქოს საკრებულოს უპატრონოდ ჰქონდა ბიბლიოთეკა მიტოვებული, რომ ხელმძღვანელობა არ ვარგოდა და არ ჰქოდნათ მიღებული შესაბამისი ზომები. არადა პირიქით, ჩემი მოთხოვნა იყო რომ ხაჯთაღიცხვა სასწრაფოდ გაეკეთებინათ”.

სამსახურში დაბრუნებისთანავე სანდროშვილმა ვითარების გარკვევა კაპანაძესთან და მოდებაძესთან პირადად სცადა: ”ორივეს დავუძახე და ვკითხე, თუ რატომ დაიბეჭდა პრესაში ასეთი ინფორმაცია”.

საკრებულოს თავმჯდომარე აცხადებს, რომ ”ეს ამბავი ზომების გარეშე არ ჩაივლის, არ არის გამორიცხული რომელიმეს პასუხისმგებლობის საკითხი დადგეს. გარკვეული ზომები აუცილებლად იქნება მიღებული”.

სანდროშვილი განმარტებით, წერილობით უნდა მიემართა ბიბლიოთეკას კულტურის გაერთიანებისთვის, მათ წერილი წარედგინათ საკრებულოში, შემდეგ საკრებულო დააწერდა გამგეობას და საჭირო თანხის გამოყოფა ბიუჯეტიდან უკვე შესაძლებელი იქნებოდა.

შეგახსენებთ, რომ წიგნების დეზინფექციისთვის ადგილობრივი ბიუჯეტიდან დაახლოებით 500 ლარი უკვე გამოიყო და წიგნების სარდაფიდან ამოტანა რამდენიმე დღეში დაიწყება.

[თამუნა უჩიძე, ახალციხე]