რა ქონებას ფლობს სამცხე–ჯავახეთის ახალი პროკურორი

2018 წლის 15 მარტს შევსებული ქონებრივი დეკლარაციის მიხედვით, შოთა რიჟამაძე თბილისში, ორთაჭალაში, გორგასლისა და გულიას ქუჩების გადაკვეთაზე, 136 კვადრატული მეტრი ფართის ბინა აქვს.

დოკუმენტის მიხედვით, მას ეს ბინა 2015 წელს, 70 000 ლარად აქვს შეძენილი. ამავე მისამართზე და ამავე წელს, 7000 ლარად აქვს ნაყიდი ავტოფარეხი, რომლის ფართი 17,6 კვადრატული მეტრია.

ამავე ტერიტორიაზე შოთა რიჟამაძეს 1500 კვადრატული მეტრი მიწის ნაკვეთი და 418 კვადრატული მეტრი კომერციული ფართი აქვს. თუმცა, ამ ქონებას რიჟამაძე წილობრივად ფლობს – კომერციული ფართის 3,12%–ს და მიწის ნაკვეთის 5%–ს.

გარდა ამ ქონებისა, მის მეუღლეს, თამრიკო სოლოღაშვილს, თბილისში, ბაჩანას ქუჩაზე, 64 კვადრატულ მეტრ ბინაში 20% –იანი წილი აქვს.
15 მარტის მდგომარეობით, შოთა რიჟამაძეს, საქართველოს ბანკში, 5 006 ლარი ერიცხება. 229 ლარი აქვს მის მეუღლეს ‘ტერა ბანკში’ სახელფასო ანგარიშზე და 510 ლარი ანაბარზე, ამავე ბანკში.


შოთა რიჟამაძემ, როგორც ვაკე-საბურთალოს რაიონულმა პროკურორმა, ანაზღაურების სახით, გასულ, 2017 წელს, 59 295 ლარი მიიღო, იმავე წელს, 205 ლარი გადაუხადა საქართველოს ტექნიკურმა უნივერსიტეტმა, სადაც ის მიწვეული პედაგოგია.

მეუღლისს ანაზღაურება გასულ წელს 35 875 ლარს შეადგენდა. თამარ რიჟამაძე საქართველოს მთავარი პროკურატურის ადმინისტრაციის საქმისწარმოების სამმართველოს უფროსის.

დეკლარაციის მიხედვით, შოთა რიჟამაძეს 2017 წლის აპრილში 28 ათასი დოლარის სესხი აქვს აღებული.

შოთა რიჟამაძე სამცხე–ჯავახეთის ოლქის პროკურორად ერთი თვის წინ, მიმდინარე წლის თებერვალში დაინიშნა.



[ნინო ნარიმანიშვილი, ახალციხე]