სამცხე – ჯავახეთის პროკურორად შოთა რიჟამაძე დაინიშნა

პროკურატურის ვებგვერდზე დაცული ინფორმაციის მიხედვით, შოთა რიჟამაძე დაიბადა 1984 წელს. 2006 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი. კარიერა დაიწყო 2007 წელს თბილისის ისანი-სამგორის რაიონული პროკურატურის სპეციალისტად.

2007-2008 წლებში სტაჟირება გაიარა თბილისის ისანი-სამგორის რაიონული პროკურატურაში. 2009-2014 წლებში მუშაობდა სხვადსხვა პოზიციებზე როგორ რაიონულ, ასევე მთავარ პროკურატურაში. ხელმძღვანელობდა სხვადასხვა დეპარტამენტებსა და სამმართველოებს სხვადასხვა სამინისტროებში. იყო ბათუმის რაიონული პროკურორი და ქვემო ქართლის საოლქო პროკურატურის საგამოძიებო ნაწილის უფროსი. 2014-2016 წლებში იყო საქართველოს მთავარი პროკურატურის თავდაცვის და სასჯელაღსრულებისა და პრობაციის სამინისტროებში გამოძიების საპროცესო ხელმძღვანელობის დეპარტამენტის უფროსის მოადგილე.

2007 წელს ჩააბარა ადვოკატთა საკვალიფიკაციო ტესტირება სისხლის სამართლის სპეციალიზაციით.

ჰყავს მეუღლე და ორი შვილი.

შოთა რიჟამაძემდე სამცხე–ჯავახეთის პროკურატურას მალხაზ კაპანაძე ხელმძღვანელობდა. იგი ქალაქ თბილისის პროკურორად გადაიყვანეს.

საქართველოს მთავარი პროკურატურის ინფორმაციით, საქართველოს პროკურატურაში 17 შიდა საკადრო ცვლილება განხორციელდა.

მათ შორის:

► ქალაქ თბილისის პროკურორად მალხაზ კაპანაძე დაინიშნა;
► აჭარის ავტონომიური რესპუბლიკის პროკურორად ნათია სონღულაშვილი დაინიშნა;
► დასავლეთ საქართველოს პროკურორად შოთა ტყეშელაშვილი დაინიშნა;
► კახეთის პროკურორად ლევან პაქსაშვილი დაინიშნა;
► შიდა ქართლისა და მცხეთა-მთიანეთის პროკურორად ავთანდილ კოჭლამაზაშვილი დაინიშნა;
► სამცხე – ჯავახეთის პროკურორად შოთა რიჟამაძე დაინიშნა.

როგორც უწყებაში აცხადებენ, ცვლილებები პროკურატურის მუშაობის ეფექტურობის გაუმჯობესებას ემსახურება.

[ნინო ნარიმანიშვილი, ახალციხე]