რა ქონებას ფლობს ასპინძის მერი როსტომ მაგრაქველიძე

ასპინძის მუნიციპალიტეტის ახლად არჩეულმა მერმა როსტომ მაგრაქველიძემ ქონებრივი დეკლარაცია ცხრა იანვარს შეავსო. დოკუმენტის მიხედვით მის სახელზე მხოლოდ BMW–ს მარკის მსუბუქი ავტომანქანა ირიცხება. ავტომობილი მაგრაქველიძემ 2014 წელს შეიძინა და 6 500 ლარი გადაიხადა.

ასევე მსუბუქი, toyota vitz – ის მარკის ავტომანქანა ჰყავს მის მეღლეს მაკა ბერიძეს. მანქანა 5 000 ლარად 2016 წელს იყიდეს.

მაკა ბერიძის სახელზეა გაფორმებული ორი მიწის ნაკვეთი, საცხოვრებელი სახლი და კომერციული ფართიც. ორივე მიწის ნაკვეთი ბერიძემ 2012 წელს შეიძინა. მან 42,00 კვ.მ ფართობში, რომელიც დაბა ასპინძაში ვარძიის N75–ში მდებარეობს 300 ლარი გადაიხადა. ამავე მისამართზე 111,00 კვ.მ ფართობში კი 36 ლარი.

ვარძიის N75–ში მდებარეობს ასევე საცხოვრებელი სახლი, რომლის ფართობიც 208,80 კვ.მ–ია. ბერიძემ ბინა 2006 წელს 3 500 ლარად შეიძინა. ვარძიის N16–ში კი 2009 წელს მას 283,00 კვ.მ კომერციული ფართი აჩუქეს.

როსტომ მაგრაქველიძეს, ვიდრე ასპინძის მუნიციპალიტეტის მერად იყრიდა კენჭს, N39 ასპინძის საოლქო საარჩევნო კომისიის თავმჯდომარის პოზიცია ეკავა. მისი მეუღლე მაკა ბერიძე კი ასპინძის მუნიციპალიტეტის გამგეობაში კულტურის, განათლების, სპორტის, ძეგლთა დაცვის, ახალგაზრდულ საქმეთა და ტურიზმის განვითარების სამსახურის უფროსი იყო.

დეკლარაციის მიხედვით, სამუშაოს შესრულებით წინა წლის პირველი იანვრიდან 31 დეკემბრის ჩათვლით მაგრაქველიძის მიერ მიღებული შემოსავალის ოდენობა 11 624 ლარს შეადგენს, მაკა ბერიძის კი 12 500 ლარს.

დეკლარაციის შევსებისას მაგრაქველიძის მიმდინარე ანგარიშზე „საქართველოს ბანკში“ 30 ლარი, „თიბისი ბანკში“ კი 2 047 ლარი ირიცხება. ამავე პერიოდისთივს მაკა ბერიძის ანგარიშზე ასევე „თიბისი ბანკში“ 2 070 ლარია ასახული.

[თამუნა უჩიძე, ასპინძა]