რა ქონებას ფლობს სამცხე-ჯავახეთის ოლქის ახალი პროკურორი

მალხაზ გეწაძემ 2001 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი;

2001 წელს იყო თერჯოლის რაიონულ სასამართლოში სხდომის მდივნის მოვალეობის შემსრულებელი (2001-2002 წ.წ.), ხოლო 2002-დან 2006 წლამდე მუშაობდა თერჯოლის რაიონული სასამართლოს სხდომის მდივნად.

2006 წელს ასევე იყო საქართველოს გენერალური პროკურატურის სტაჟიორი და ამავე წელს თბილისის ვაკე-საბურთალოს რაიონული პროკურატურის სტაჟიორი; 2006-2007 წლებში კი ეკავა თბილისის ვაკე-საბურთალოს რაიონული პროკურატურის პროკურორის თანამდებობა.

2007-2009 წლებში მუშაობდა ქუთაისის რაიონული პროკურატურის პროკურორად; 2009-2012 წლებში იყო სს „ხვისტანი და კომპანიაში“ ადვოკატი, 2012-2013 წლებში კი - საქართველოს ადვოკატთა ასოციაციის წევრი, ადვოკატი. 2013-2015 წლებში მან კარიერა განაგრძო საქართველოს მთავარი პროკურატურის შინაგან საქმეთა სამინისტროს საზოგადოებრივი უსაფრთხოების სამსახურებში, სახელმწიფო დაცვის სპეციალურ სამსახურში და დაზვერვის სამსახურში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე, ზედამხედველობის დეპარტამენტის შინაგან საქმეთა სამინისტროს სახელმწიფო უსაფრთხოების სააგენტოში და ანტიკორუფციულ სააგენტოში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე ზედამხედველობის სამმართველოში პროკურორად;

2015-2016 წლებში ეკავა საქართველოს მთავარი პროკურატურის სახელმწიფო უსაფრთხოების სამსახურში, სახელმწიფო დაცვის სპეციალურ სამსახურში, დაზვერვის სამსახურში და შინაგან საქმეთა სამინისტროს სახელმწიფო საქვეუწყებო დაწესებულება - საქართველოს სასაზღვრო პოლიციაში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე ზედამხედველობის დეპარტამენტის სახელმწიფო უსაფრთხოების სამსახურის სახელმწიფო უსაფრთხოების დეპარტამენტში, ანტიკორუფციულ სააგენტოში და გენერალურ ინსპექციაში გამოძიების საპროცესო ხელმძღვანელობისა და ოპერატიულ-სამძებრო საქმიანობაზე ზედამხედველობის სამმართველოს პროკურორის პოზიცია; 2016-2018 წლებში მუშაობდა სამტრედიის რაიონულ პროკურორად. 2018 წლის 4 ივნისიდან თბილისის ძველი თბილისის რაიონული პროკურორის პოსტი ეკავა;

2019 წელს შევსებული დეკლარაციის მიხედვით, მალხაზ გეწაძის მეუღლე მაია დევაძე თერჯოლის მუნიციპალიტეტის სოფელ ახალთერჯოლაში ფლობს ერთ საცხოვრებელ სახლს, ერთ სათავსოს და ოთხ მიწის ნაკვეთს, ამავე სოფელში 25%–იანი წლის მფლობელია შვიდ ნაკვეთის და ერთი სახლის.

თავად მალხაზ გეწაძე თბილისში, სოფელ დიღომში ფლობს სახლს (115.16 კვ.მ) და მიწის ნაკვეთს(500 კვ.მ), რომელიც 2015 წელს 73 591 ლარად შეიძინა. გეწაძეს პირად ანგარიშზე დანაზოგიც აქვს 13 000 დოლარის ოდენობით. მას ძველი თბილისის რაიონული პროკურორის პოზიციაზე გასულ წელს ხელფასის სახით დაერიცხა 43 272 ლარი.

ჰყავს მეუღლე და სამი შვილი.

[მარიამ ბარძიმაძე, ახალციხე]