ბორჯომში 16 მარტს დანიშნული საკრებულოს სხდომა აღარ ჩატარდება

ბორჯომის მუნიციპალიტეტის საკრებულომ მერიას საშტატო ნუსხის და სარგოების საკითხი შენიშვნებით დღეს, 15 მარტს დაუბრუნა. აღნიშნული გადაწყვეტილება საფინანსო-საბიუჯეტო, ეკონომიკისა და ქონების მართვის საკითხთა კომისიის სხდომაზე მიიღეს.

საკრებულოს წევრი „ლეიბორისტული პარტიიდან“ გიორგი გიუაშვილი აცხადებს, რომ ხელფასების მატების საკითხთან დაკავშირებით ოპოზიციონერი დეპუტატები პოზიციას არ ცვლიან: „ იგივე დოკუმენტი გადავუგზავნეთ მერიას, რაც შვიდი მარტის სხდომაზე გვქონდა მიღებული. ამჯერად განსხვავება მხოლოდ ბორჯომის მერის ხელფასია. წინა კვირაში მერმა განაცხადა არ მინდა ხელფასის მომატება და რატომ მიზრდით 300 ლარითო, ამიტომ ისევ დავუტოვეთ 2650 ლარი“.

ბორჯომის მუნიციპალიტეტის მერიაში აცხადებენ, რომ გეგმიური საკრებულოს სხდომა 28 მარტს ჩატარდება და ამ დღეს დაელოდებიან, მანამდე კი არაფრის შეცვლას არ აპირებენ.

შეგახსნებთ, რომ ბორჯომის მუნიციპალიტეტის საკრებულო ხელფასების მატების საკითხი ხვალ, 16 მარტს მეშვიდედ უნდა განეხილა. ბოლოს საკრებულოს აღნიშნულ თემაზე 9 მარტს უნდა ემსჯელა, თუმცა, საკრებულომ ხელფასების განმსაზღვრელი დოკუმენტი სხდომაზე განხილვის გარეშე მერიას უკან დაუბრუნა. ამის გამო 9 მარტს დანიშნული სხდომა აღარ ჩატარდა. 10 მარტს ბორჯომის მერმა ლევან ლიპარტიამ ბრიფინგი გამართა და საკრებულო საბოტაჟსა და პროვოკაციაში დაადანაშაულა.

ასევე შეგახსენებთ, რომ ხელფასების და საშტატო ნუსხის დამტკიცების საკითხის განხილვას სიტყვიერი და ფიზიკური დაპირისპირებამოხდა დეპუტატებს შორის 28 თებერვლის სხდომაზე, შენობაში რამდენიმესაათიანი აურზაური, მეორე დღეს კი მერიის თანამშრომლების საპროტესტო აქცია მოჰყვა.

[თიკო ზაზაძე, ბორჯომი]