ბორჯომში დასრულდა ხელისუფლების აქცია ოპოზიციის წინააღმდეგ [photo/ Video]

მთავარი → სიახლე, პოლიტიკა 01.03.2018

საკრებულოს თავმჯდომარის ზაზა ჩაჩანიძის გადადგომის მოთხოვნით დაიწყო და რიგგარეშე სხდომის დანიშვნის მოთხოვნით დასრულდა ბორჯომში ხელისუფლების ორგანიზებული აქცია, რომელიც ერთ საათს გაგრძელდა და რომელსაც უპრეცენდენტოდ ბევრი სამართალდამცველი იცავდა.

აქცია ბორჯომის მუნიციპალიტეტის საკრებულოს დეპუტატებმა 'ქართული ოცნებიდან' გუშინ, გვიან ღამით დააანონსეს. დაახლოებით 01:48 საათზე, დეპუტატებმა სპეციალური ბრიფინგი გამართეს და განაცხადეს, რომ ვინაიდან საკრებულოს თავმჯდომარე ზაზა ჩაჩანიძე არ აწერს ხელს საკრებულოს სხდომის ოქმს, ბორჯომში საპროტესტო აქციები დაიწყება მისი გადადგომის მოთხოვნით.

გუშინ ღამით ბორჯომში გამართული ბრიფინგი, რომელზეც აქცია და გაფიცვა დააანონსეს

დეპუტატებს განზრახვა არც დღეს, 1–ელ მარტს, დილით შეუცვლიათ. დღეს დილით მათ მოქალაქეებს 17:00 საათზე ქალაქის ცენტრში შეკრებისკენ მოუწოდეს.

აქციის დაწყებამდე "ქართული ოცნების" დეპუტატმა გიორი ფერაძემ განაცხადა, რომ აქციის ერთადერთი უპირობო მოთხოვნაა გადადგეს ზაზა ჩაჩანიძე.

აქცია ზუსტად 17:00 საათზე დაიწყო. იმ ტერიტორიაზე, სადაც აქცია უნდა გამართულიყო, უპრეცენდენტოდ ბევრი სამართალდამცველი იყო მობილიზებული.

აქციას ესწრებოდა ბორჯომის მერი ლევან ლიპარტიაც, რომელმაც აქციის დაწყებამდე ნახევარი საათით ადრე, ოფიციალური განცხადება გაავრცელა და თქვა, რომ მზად იყო უარი ეთქვა საკუთარი ხელფასის მატებაზე.

აქციაზე სიტყვით ძირითადად საკრებულოს თანამშრომლები გამოვიდნენ, რომლებიც ამბობდნენ, რომ "ბორჯომი აღარ ვითარდება".

ბორჯომის მერის განცხადება აქციის დასრულების შემედეგ

როგორ განვითარდება მოვლენები ბორჯომში, ამ ეტაპზე უცნობია. ზაზა ჩაჩანიძემ რიგგარეშე სხდომის მოწვევა ხელფასების საკითხზე მმართველ გუნდს გუშინვე შესთავაზა. რაც შეეხება მეორე, ანუ, მისი გადადგომის მოთხოვნას, საკრებულოს თავმჯდომარე ამბობს, რომ გადადგომას არ აპირებს.

ბორჯომში დასრულდა ხელისუფლების აქცია ოპოზიციის წინააღმდეგ [photo/ Video]