ბორჯომში მერიის ხელფასების დასამტკიცებლად საკრებულოს ახალ თავმჯდომარეს ელიან

დღეს, 28 მარტს, ბორჯომის მუნიციპალიტეტის საკრებულოს თავმჯდომარის იმპიჩმენტის შემდეგ, დეპუტატებს მერიის საშტატო განრიგი და თანამდებობრივი სარგოები უნდა დაემტკიცებინათ. თუმცა, აღნიშნული საკითხის განხილვა მომავალი სხდომისთვის გადაიდო. დეპუტატებმა გადაწყვიტეს, რომ ხელფასების ოდენობას კენჭი მაშინ უყარონ, როცა საკრებულოს ახალ თავმჯდომარეს აირჩევენ.

მერიიდან საკრებულოში წარდგენილი თანამდებობრივი სარგოების მიხედვით, რომელზეც დღეს უნდა ემსჯელათ, მერის ხელფასი 2 650 ლარია, სამსახურების უფროსების – 2 000 ლარი, განყოფილების უფროსების – 1 600 ლარი, სპეციალისტების – 1 000 – 1 100 ლარი.
საშტატო ნუსხის მიხედვით მერიაში 88 შტატია განსაზღვრული, ამას ემატება სამხედრო აღიცხვისა და გაწვევის სამსახურის ხუთი შტატი. საერთო ჯამში, 93 თანამშრომლისთვის თვეში სახელფასო ფონდი 117 350 ლარი გამოდის.

„საშტატო ნუსხა დარჩება უცვლელი და ხელფასების ნაწილში ეს დოკუმენტი შეიცვლება“, – აცხადებს ბორჯომის მუნიციპალიტეტის საკრებულოს უკვე ყოფილი თავმჯდომარის ზაზა ჩაჩანიძის მოადგილე გიორგი გოგიჩაიშვილი.

შეკითხვაზე, რა შეიცვლება ხელფასების ნაწილში, გოგიჩაიშვილი გვპასუხობს: „ჯერ ეს არ ვიცით, ვეცდებით საკრებულოსა და მერიას შორის ჩამსხვრეული ხიდი აღვადგინოთ და კომუნიკაცია დავიწყოთ. აუცილებლად დამტკიცდება მომავალ სხდომაზე ხელფასების საკითხი ისე, რომ არც თვითმმართველობის თანამშრომლები და არც ბიუჯეტი არ დაზარალდეს“.

რას შეცვლის მომავალ სხდომაზე გასატანად საშტატო ნუსხისა და თანამდებობრივი სარგოების განმსაზღვრელ დოკუმენტში მერია უცნობია. აღმასრულებელ ორგანოში ამ საკითხზე კომენტარს არ აკეთებენ.

ბორჯომის თვითმმართველობაში კრიზისი მერიის გაზრდილი ხელფასების დამტკიცების საკითხმა შექმნა. საკრებულოს მერიის გადაგზავნილი დოკუმენტი მეშვიდედ უნდა განეხილა, თუმცა, ამჯერად დეპუტატებს, აღნიშნული საკითხი სხდომაზე არ გაუტანიათ, მიზეზი საკრებულოს თავმჯდომარის ზაზა ჩაჩანიძის იმპიჩმენტი გახდა. დღეს, 28 მარტს, დეპუტატებმა, 19 ხმით ორის წინააღმდეგ, ჩაჩანიძე დაკავებული პოზიციიდან გადააყენეს.

[თამუნა უჩიძე, ბორჯომი]