ლევან ლიპარტია: ხელფასის ზრდაზე უარი განვაცხადე, საკრებულო კი მიმატებს, ეს პროვოკაციაა

ბორჯომის მუნიციპალიტეტის მერიაში, ლევან ლიპარტიამ ბრიფინგი დღეს, 10 მარტს გამართა.

"გაუგებარია რატომ მთავაზობენ სარგოს გაზრდას, როდესაც მე ხელფასის მატებაზე უარი განვაცხადე. მთავაზობენ დანარჩენ თანამშრომლებს მოვაკლო ხელფასი და ჩემი გაიზარდოს. ეს საკრებულოს მხრიდან არის საბოტაჟი, პროვოკაცია", – განაცხადა ლევან ლიპარტიამ.

მისი თქმით, მესამე თვეა მერიის თანამშრომლები უხელფასოდ მუშაობენ: " არ შეიძლება ასეთი რამ გააკეთო. ეს არის სირცხვილი თითოეული ბორჯომელისა, შეურაცხყოფა ჩვენი და მთელი საქართველოსი".

ლევან ლიპარტიას განცხადებით, მერია საკრებულოს ორშაბათს, 12 მარტს, იგივე საშტატო ნუსხას და ხელფასების ოდენობას ჩააწოდებს,რომელიც საკრებულომ ხუთ მარტს მიიღო, თუმცა მის განხილვაზე უარი განაცხადა.

"დაფიქსირებული იქნება, რომ თითოეულ თანამშრომელს სრულიად კანონიერად გაეზარდოს ხელფასი, ხოლო ჩემი დარჩეს უცვლელი. მე მინდა მოვუწოდო მათ გადადგან ერთადერთი გონივრული ნაბიჯი, გონივრული გზა აირჩიონ და ამ ხალხის სახელფასო ცვლილებას მხარი დაუჭირონ ", – განაცხადა ლევან ლიპარტიამ.

შეკითხვაზე, თუ არ დამტკიცებს მათ მიერ ჩაწოდებულ საშტატო ნუსხას საკრებულო, შესაძლოა თუ არა ისევ გაიფიცოს მერია, გვპასუხობს:"არ ვიცი როგორ განივითარდება მოვლენები".

"ქართული ოცნების" ფრაქციის თავმჯდომარე ირაკლი კვირკველია არ გამორიცხავს, რომ ხელფასების იმ ოდენობით მატებას, რასაც ახლა მიაწვდის მერია საკრებულოს, ოპოზიციონერი დეპუტატების ნაწილი მხარს დაუჭერს.

"ზაზა ჩაჩანიძეს შეეშინდა, რომ თუ სხდომაზე ამ დოკუმენტს შეიტანდა და ცხრა მარტს იმსჯელბდნენ, მისი გუნდის წევრებს შესაძლოა მხარი დაეჭირათ, ამიტომ დეოკუმენტი საკრებულოს სხდომაზე განუხილველად მერიას გადაუგზავნა", – განაცხადა ირაკლი კვრიკველიამ.

შეგახსენებთ, რომ ბორჯომის მერიამ საკრებულოს ახალი საშტატო ნუსხისა და თანამდებობრივი სარგოების დამტკიცების თაობაზე ოთხჯერ მიმართა. მეოთხედ საკრებულოს ცხრა მარტს უნდა ემსჯელა, თუმცა, საკრებულომ ხელფასების განმსაზღვრელი დოკუმენტი სხდომაზე განხილვის გარეშე მერიას უკან დაუბრუნა. ამის გამო ცხრა მარტს დანიშნული სხდომა აღარ ჩატარდა.

საკრებულომ მერიას ხელფასების მატების ახალ ვერსია შესთავაზა, სადაც მერის, მოადგილეების, ასევე სამსახურების და განყოფილებების ხელმძღვანელი პირების სახელფასო სარგოები, მერიის მიერ წარმოდგენილ სარგოებთან შედარებით 400–300 ლარით ნაკლებია.



[თამუნა უჩიძე, თინათინ ზაზაძე – ბორჯომი]