არქივის ეზოში აღმოჩენილ კედლის ნაშთებს შემინავენ

ახალციხეში, მანველიშვილის N5–ში მდებარე ქალაქის არქივის შენობის ეზოში აღმოჩენილი მე–18 – მე19 საუკუნის შენობის კედლები წითელი ლენტითაა შემოსაზღვრული. საჯარო რეესტრის ეროვნულმა სააგენტომ კუტლურული მემკვიდრეობისა და ძეგლთა დაცვის სააგენტოსთან ერთად გადაწყვიტა, რომ სამცხე–ჯავახეთის არქივი ისევ ამ ადგილზე აშენდება, თუმცა ამისთვის შენობის პროექტი შეიცვლება.

საჯარო რეესტრის ეროვნული სააგენტოში აცხადებენ, რომ პროექტის შეცვლაზე უკვე მუშაობენ. გადაკეთებული პროექტი კი ისეთი უნდა იყოს, რომ მე–18 – მე–19 საუკუნით დათარიღებული შენობის კედლები ხელუხლებელი დარჩეს, გარედან შეიმინოს და მისი დათვალიერება შესაძლებელი გახდეს.

„არ ვიცით საბოლოო ვერსია ღირებულებას გაგვიზრდის, იგივეს დატოვებს თუ შეამცირებს. ვიდრე პროექტი არ დასრულდება, არც ის გვეცოდინება, ხელახლა გამოცხადდება ტენდერი თუ მშენებლობას იგივე კომპანია გააგრძელებს“, – აცხადებენ ეროვნული არქივის საზოგადოებასთან ურთიერთობის სამსახურში და ამატებენ, რომ გადაკეთებულ პროექტს საბოლოოდ ისევ ძეგლთა დაცვის სააგენტოსთან შეათანხმებენ.

გარდა არქივის შენობისა, ასევე მზადდება პროექტი არქეოლოგიური აღმოჩენის შესამინად. აღნიშნულ პროექტზე საქართველოს კულტურული მემეკვიდრეობისა და ძეგლთა დაცვის სააგენტო მუშაობს.

„აქ მხოლოდ შემინვა არ მოხდება. ეს ისე გაკეთდება, რომ აღმოჩენილი არქეოლოგია კიდევ უფრო უკეთ წარმოჩინდება და მისი დათვალიერება საინტერესოც იქნება. პროექტს ჩვენ მოვამზადებთ, დანარჩენს იუსტიციის სამინისტრო გააკეთებს“, – ამბობს საქართველოს კულტურული მემეკვიდრეობისა და ძეგლთა დაცვის სააგენტოს ხელძღვანელი ნიკა ანთიძე.

შეგახსენებთ, რომ ახალციხეში, მანველიშვილის N5–ში მდებარე ქალაქის არქივის შენობის გვერდით სამ სართულიანი კორპუსი შენდებოდა. სამშენებლო სამუშაოებს შპს „ხომერიკი და კომპანია“ ასრულდებდა. საჯარო რეესტრის ეროვნული სააგენტოს მიერ გამოცხადებულ ტენდერში აღნიშნულმა შპს–მ 1.349.731 ლარით გაიმარჯვა. ამ თანხით კომპანიას სამსართულიანი შენობა უნდა დაედგა, რომელშიც სამცხე–ჯავახეთის არქივი განთავსდებოდა, თუმცა მიწის სამუშაოების დროს მუშებმა ეზოში კედლები აღმოაჩინეს და ამის შემდეგ მუშაობა შეჩერდა.

ძეგლთა დაცვის სააგენტოს დასკვნის მიხედვით ივარაუდება, რომ „ შესწავლილი ნაგებობა შესაძლებელია გამოყენებული ყოფილიყო, როგორც საყოფაცხოვრებო“.



[თამუნა უჩიძე, ახალციხე]