ეროვნული სააგენტო: „ახალციხეში აღმოჩენილი შენობა მეჩეთის ნანგრევია და ზედ ეკლესიაა დაშენებული“

საქართველოს კულტურული მემკვიდრეობისა და ძეგლთა დაცვის სააგენტომ ახალციხის არქივის ეზოში აღმოჩენილი შენობის შეწავლა დაასრულა.

„არქეოლოგმა დასკვნა 30 დეკემბერს გადმოგვიგზავნა. სრული სურათი უკვე გვაქვს, მის მიხედვით ამ ადგილზე მეჩეთი იყო აშენებული, შემდეგ უკვე დაშლილი მეჩეთის ადგილზე ეკლესიაა აშენებული“, – აცხადებენ კულტურული მემკვიდრეობისა და ძეგლთა დაცვის სააგენტოს საზოგადოებასთან ურთიერთობის სამსახურში.

უწყების ინფორმაციით აღმოჩენილი არქეოლოგიური ნაშთის კონსერვაცია მოხდება და ის საპრეზენტაციოდ მინის ქვეშ მოექცევა: "თვალსაჩინოების მიზნით ზემოდან მინით დაიფარება, ამის შესახებ მშენებელს დაველაპარაკებით, რომ იქ გარკვეული კორექტირება შეიტანონ და ეს არქეოლოგიური ნაშთი ხელუხლებელი დატოვონ“.

რაც შეეხება აღმოჩენის შესახებ დეტალურ ინფომრაციას ძეგლთა დაცვის სააგენტოში აცხადებენ, რომ ამის შესახებ დასკვნას გადმოგვიგზავნიან.

შეგახსენებთ, რომ აღმოჩენილი ნაგებობა სავარაუდოდ მე–18–მე–19 საუკუნით თარიღდება. ათ მეტრზე მეტი სიგრძის კედლები კი ახალციხის არქივის ეზოში სამშენებლო სამუშაოების წარმოებისას აღმოაჩინეს. აქ საჯარო რეესტრის ეროვნული სააგენტოს მიერ გამოცხადებულ ტენდერის მიხედვით სამცხე–ჯავახეთის არქივისთვის ახალი შენობა შენდებოდა.

[თამუნა უჩიძე, ახალციხე]