სად აშენდება სამცხე–ჯავახეთის არქივის შენობა

ახალციხეში, მანველიშვილის N5–ში მდებარე ქალაქის არქივის შენობის გვერდით სამ სართულიანი კორპუსი შენდებოდა. აქ საჯარო რეესტრის ეროვნული სააგენტოს ნინოწმინდის, ახალქალაქისა და ბორჯომის არქივები უნდა განეთავსებინა. ახალციხის არქივის ეზოში სამშენებლო სამუშაოებს შპს „ხომერიკი და კომპანია“ 1.349.731 ლარში ასრულებდა. თუმცა, მშენებლობა ამ დროისთვის შეჩერებულია. მიწის სამუშაოების დროს არქივის ეზოში მე–19 საუკუნის ბოლოსა და მე–19 საუკუნის დასაწყისით დათარიღებული შენობის კედლები აღმოაჩინეს.

„კულტურის სამინისტროს პასუხს ველოდებით რას გვეტყვიან, დაგვრთავენ ნებას, რომ ისევ მანდ ავაშენოთ არქივი, თუ არა“, – გვითხრეს არქივის მშენებელ კომპანიაში.

ამ დრომდე რომ ახალი შენობის შესახებ გადაწყვეტილება მიღებული არ არის, ამაზე ახალციხის არქივის ხელმძღვანელი ცისანა ნარიმანიძეც საუბრობს: „ველოდებით რა გადაწყვეტილება იქნება მიღებული ეროვნულ სააგენტოში“.

ეროვნულ სააგენტოში ამბობენ, რომ არქვის მშენებლობა კვლავ იმ ადგილზე განიხილება, სადაც დაიწყო. უწყების ინფორმაციით აღმოჩენილი არქეოლოგიური ნაშთის კონსერვაცია მოხდება და ის საპრეზენტაციოდ მინის ქვეშ მოექცევა: "თვალსაჩინოების მიზნით ზემოდან მინით დაიფარება, ამის შესახებ მშენებელს დაველაპარაკებით, რომ იქ გარკვეული კორექტირება შეიტანონ და ეს არქეოლოგიური ნაშთი ხელუხლებელი დატოვონ“.

შეგახსენებთ, რომ აღმოჩენილი ნაგებობა სავარაუდოდ მე–18–მე–19 საუკუნით თარიღდება, ეროვნული სააგენტოს ანგარიშის მიხედვით: „აღმოჩენილი ნაგებობის, თითქმის ნახევარი არქივის შენობის ქვეშაა მოქცეული, ხოლო შემორჩენილი ნაწილი თითქმის საძირკვლამდეა დანგრეული. ამიტომ კონკრეტული დანიშნულების გარკვევა ძნელია, თუმცა, მოპოვებული მწირი ინფორმაციის საფუძველზე, ივარაუდება, რომ შესწავლილი ნაგებობა შესაძლებელია გამოყენებული ყოფილიყო, როგორც საყოფაცხოვრებო, უფრო კი სამხედრო, ან რელიგიური დანიშნულებით“.

[თამუნა უჩიძე, ახალციხე]