არქივის ეზოში აღმოჩენის გამო შეჩერებული მშენებლობა არ განახლებულა

ახალციხეში, მანველიშვილის N5–ში მდებარე ქალაქის არქივის ეზოში აღმოჩენილი მე–18 – მე19 საუკუნის შენობის კედლებზე ისევ არქივის კორპუსი უნდა აშენდეს, ოღონდ ისე, რომ აღმოჩენა შეიმინება და მისი დათვალიერებაც შესაძლებელი იქნება. ამისთვის კი შენობის პროექტის შეცვლაა საჭირო.

ძეგლთა დაცვის სააგენტოში აცხადებენ, რომ პროექტის კორექტირება იმ კომპანიამ უნდა გააკეთოს, რომელმაც აქ კორპუსის მშენებლობა დაიწყო და გასული საუკუნეების კედლები აღმოაჩინა: „ხომერიკი და კომპანია“ გადმოგვიგზავნის პროექტის კორექტირებულ ვერსიას განსახილველად, თუმცა ჯერ ეს პროექტი არ მიგვიღია“.

მშენებელ კომპანიაში ამბობენ, რომ მუშაობა ივლისის ბოლომდე დასრულდება და სააგენტოს პროექტს გადაუგზავნიან: „იქ განიხილავენ, დაამტკიცებენ და დაგვიბრუნებენ. როგროც კი პროექტს მივიღებთ მშენებლობა დაიწყება“.

ამ დროისთვის კი არქივის ეზოში მოსამზადებელი სამუშაოები მიმდინარეობს, ტერიტორიას ასუფთავებენ და მშენებლობის დასაწყებად ემზადებიან. პარალელურად კი ახალციხის არქივის შენობას რეაბილიტაცია უტარდება.

შეგახსენებთ, რომ ახალციხეში, მანველიშვილის N5–ში მდებარე ქალაქის არქივის შენობის გვერდით სამ სართულიანი კორპუსი შენდებოდა. სამშენებლო სამუშაოებს შპს „ხომერიკი და კომპანია“ ასრულებდა. საჯარო რეესტრის ეროვნული სააგენტოს მიერ გამოცხადებულ ტენდერში აღნიშნულმა შპს–მ 1.349.731 ლარით გაიმარჯვა. ამ თანხით კომპანიას სამსართულიანი შენობა უნდა დაედგა, რომელშიც სამცხე–ჯავახეთის არქივი განთავსდებოდა, თუმცა მიწის სამუშაოების დროს მუშებმა ეზოში კედლები აღმოაჩინეს და ამის შემდეგ მუშაობა შეჩერდა.

ძეგლთა დაცვის სააგენტოს დასკვნის მიხედვით ივარაუდება, რომ „შესწავლილი ნაგებობა შესაძლებელია გამოყენებული ყოფილიყო, როგორც საყოფაცხოვრებო“.

[თორნიკე ზაზაძე, ახალციხე]