კოსტავას ქუჩაზე ხანძრისგან მიყენებულ ზარალს მერია სწავლობს

როგორც ახალციხის მერიაში ამბობენ, ზარალის შემსწავლელი კომისია ჯანდაცვისა და სოციალური დახმარებისა და ინფრასტრუქტურის სამსახურების თანამშრომლებისგან დაკომპლექტდა.

„ჯერ დაითვალონ ზარალი და შემდეგ განისაზღვრება, რა თანხით შეიძლება დაეხმაროს ოჯახებს მერია“, – განმარტავენ თვითმმართველობაში.

შეგახსენებთ, რომ კოსტავას 50 ნომერში ხანძარი 2 აპრილს, გამთენიას გაჩნდა. ცეცხლი ჯერ, ერთერთი სახლის სახურავში გაჩნდა, შემდეგ კი გვერდით მდგომ ოთხ სახლს მოედო. ხუთი სახლისდან ერთის მეპატრონე რუსეთშია, ოთხი ოჯახიდან განსაკუთრებულად დაზარალებული ერთი კი თავს მეზობელთან აფარებს.

ამ შემთხვევას, ორი კვირით ადრე, 21 მარტს, მესხეთის ქუჩაზე გაჩენილი ხანძარი უსწრებდა, რა დროსაც, სამი ოჯახი დაზარალდა. უკვე გადაწყვეტილია, რომ მათ მერია 2500 ლარამდე თანხას გამოუყოფს.

„მესხეთის ქუჩაზე დაზარალებულებს მალე ჩაერიცხებათ თანხა. საფინანსო სამსახური უკვე მუშაობს ამაზე“, – განმარტავენ მერიაში.

[ლუბა გიორგაძე, ახალციხე]