ბორჯომის საკრებულომ მერიის გაზრდილი ხელფასები დაამტკიცა

ბორჯომის მუნიციპალიტეტის მერიაში თანამშრომლებს ხელფასი 150–დან–400–ლარამდე გაეზრდებათ. მერის მოადგილეს კი 500 ლარი დაემატება. არ იზრდება მხოლოდ მუნიციპალიტეტის მერის ხელფასი.

რაც შეეხება საკრებულოს, აქ ხელფასი მხოლოდ საკრებულოს აპარატის 16 თანამშრომელს,ასევე, 150–დან–400–ლარამდე მოემატება. იგივე რჩება საკრებულოს თავმჯდომარის, მისი მოადგილის, კომისიის და ფრაქციების თავმჯდომარეების თანამდებობრივი სარგოები.

ბორჯომის თვითმმართველობის თანამშრომლები სამი თვის ხელფასს ეტაპობრივად აიღებენ. მერიის საფინანსო–საბიუჯეტო სამსახურში აცხადებენ, რომ ერთიანად დარიცხვა შეუძლებელია: "ამას ხაზინა არ გაატარებს. სამი თვის ხელფასი იმ ოდენობით გაიცემა, რაც დღეს დაამტკიცეს, ანუ თანმშრომლები დაგვიანებით, მაგრამ მომატებულ ხელფასებს მიიღებენ".

22 დეპუტატიდან მერიის თანამშრომლებისთვის ხელფასების მატების წინააღმდეგი მხოლოდ ერთი, "პატრიოტთა ალიანსის" წევრი ვიოლეტა ბალახაშვილი იყო.

"მინდოდა, რომ ამ დაზოგილი თანხით ბავშვებს ხატვის და მუსიკის წრეებზე სიარულის საშუალება ჰქონოდათ. ვწუხვარ, რომ ეს ასე არ მოხდა. კიდევ ერთი მიზეზი, რატომაც არ დავუჭირე მხარი ხელფასების მატებს, იყო ის, რომ მერის ხელფასი არ გაიზარდა. ყველაზე მეტი პასუხისმგებლობა მას აქვს", – ამბობს ვიოლეტა ბალახაშვილი.

შეგახსენებთ, რომ დღეს, ორ აპრილს ბორჯომის მუნიციპალიტეტის საკრებულოს რიგგარეშე სხდომა გაიმართა, სადაც დეპუტატებმა საკრებულოს თავმჯდომარე და მისი მოადგილე აირჩიეს. ასევე დაამტკიცეს თვითმმართველობის საშტატო ნუსხა და თანამდებობრივი სარგოები განსაზღვრეს.

[sknews.ge]