ერთ კვირაზე მეტია ახალციხის რამდენიმე ქუჩაზე გარე განათებაა დაზიანებული

მეხუთე საჯარო სკოლის მიმდებარედ, კეცხოველის ქუჩის დასაწყისში არსებული ლამპიონებიდან ოთხი, დიდი ხანია აღარ ანთებულა. ქუჩის დასასრულში ერთი ლამპიონი კი პერიოდულად ინთება და ქრება. ამის გამო, ქუჩის დასაწყისი, სადაც ერთ–ერთი სახიფათო გზაჯვარედინია, თითქმის ჩაბნელებულია.

განსხვავებით კეცხოველის ქუჩისგან, ცენტრალური ქუჩები არ არის ფარნავაზ მეფისა და დიდიმამიშვილის ქუჩები. გარე განათება აქაც დიდი ხნის წინ გაფუჭდა.

როგორც „სამხრეთის კარიბჭემ“ გაარკვია, ახალციხეში გარე განათებების სისტემის მოწყობასა და შეკეთებაზე პასუხისმგებელი კომპანია შპს „ერისიმედია“. კომპანიამ გარე განათების მოწყობის სამუშაოებზე 2016 წლის 20 იანვარს გამოცხადებულ ტენდერი 555 859 ლარით მოიგო.

ახალციხის მერიაში ამბობენ, რომ აღნიშნული დაზიანებების შესახებ მათ კომპანიას 14 თებერვალს, წერილობით აცნობეს. პასუხი კომპანიამ 19 თებერვალს დააბრუნა, სადაც წერია, რომ გამოგზავნიან წარმომადგენელს, რომელიც პრობლემას შესწავლის.

„2 მარტს კომპანიის წარმომადგენლები ჩამოვლენ და ყველა დაზიანებულ ლამპიონს შეაკეთებენ“, – ირწმუნებიან ახალციხის მერიაში.

[მარიამ ბარძიმაძე, ახალციხე]